مهايط وتبذير... كتاب الامس

مهايط وتبذير

الضيف ما يبغى مهايط وتبذير
يبغى طلاقة وجه ناس ٍ بشوشة

يبغى تراحيبٍ وقيمة وتقدير
من واحدٍ سلم المراجل يحوشه

يومن زمنّّّا مابه اليوم تعسير
من فضل ربي راهياتٍ قروشه

رغم إن فيه ضعوف ناس ٍمفاقير
بس الرضا يسّر عسير المعوشة

والدار مليانة بأهل الدنانير
والكل منهم لاهين في عروشه

يمنع زكاته من حقوق المعاسير
يشح في ماله وتكبر كروشه

يقطعك يا وجهٍ تحوش المخاسير
ما خفت من نار ٍ تلظّى تنوشه؟

فالله يغنينا بفضله عن الغير
ويكفينا من وقتٍ تسابق وحوشه

ما باقي إلا تسرق الطير واتغير
تحوش ما حاشت محاضن عشوشه

قطعا عساها للسنين المدابير
ويا حيّ من كبدي عليها عطوشه

تفريج هم ٍ .. طلعةٍ تالي عصير
في خايع ٍ ممطور وابل رشوشه

تفرش وتضبطها دلال ٍ مباهير
تجلي عمس وقت ٍبلانا بدوشه

مع رفقة رجالٍ قرومٍ مناعير
علم وقصايد في مرودع نقوشه

ما هيب هذّاره وتاطا المحاذير
مثل السفيه اللي تدهور بطوشه

العلم وافي والفعايل مسافير
رفقة نقا بالعسر ماهي مغشوشه

تسلم عساها للدروب المخاضير
أفعالها بالضيف ماهي مخدوشه

ما تتبع هياطٍ تقفّاه تبذير
يوم إنها زادت علينا طروشه

والختم جعل أيامنا خير في خير
نسلم من هياطٍ تناهق جحوشه

عبدالرحمن الدايل / محافظة مرات
11 ربيع ثاني 1437هـ

بعض الشعر

.       ((((بعض الشعر))))

بعض الشعر ياصاحبي يمرض الراس
عيب على اللي ينشره ويحكي به
تصفيف هرج مع ملاغة ومنحاس
ومضمونه الفارغ يزيد المصيبه
لافيه لا معنى ولا طاري احساس
ولا جديد للملا يعتزي به
كب الشعر لا صار ماهوب نبراس
مثل الفنر بالليل لك تهتدي به
راعيه ينظم كل بيت على ساس
وله حكمة بين البشر تقتدي به
كل يبي ينشر قصيده مع الناس
لكن تروّى لا يجي فيك ريبه
الطرق والميزان له عدة اجناس
والقافية ما هيب حرف تعدي به
اضبط به المعنى الى عنّ هوجاس
ترى القصيد الزين يغشاك طيبه
والا الردي بحكاه ما حاش نوماس
زود على شينه هروجه رتيبة
لا تخدعه بالراي وتصير بلاس
ان كان له عندك مقام وهيبه
وضّح له المعنى ترى عنده عماس
حطّاب ليل غادي في قليبه
خسارة فيه الحبر فوق قرطاس
عار  على راعيه يشناه عيبه

عبدالعزيز الضويحي-ابوعبدالله
الخميس ١٤٣٧/٤/١١هـ

ابوسامي الضويحي يرد على ابيات المؤرخ الضويحي

ابوسامي الضويحي يرد على ابيات المؤرخ الضويحي

ابوريان الدعيج مسندا على ابوعبدالله الضويحي

.              مساجلة ((ياحظ))

كتب لي الشاعر عبدالله الدعيج ابوريان هذه الابيات:

ياحظ وش بيني وبينك من الثار.
يومك معاندي على كل حزه.

لا قلت زان الوقت ياسرع ماثار.
بركان جورك والزلازل تهزه.

ارحم شقيا صابرا كيف ماصار.
قلبه على طاري المواجع يجزه.

لابن ضويحي سقت زينات الاشعار.
اللي بقلبي له مقام ومعزه.

ياصاحبي قلي ترى القلب محتار.
وش حيلة اللي صار وقته يخزه.

عسى ولي البيت علام الاسرار.
يعدل لي المايل وحظي يرزه.

ابوريان الدعيج
السبت ١٤٣٧/٤/٦هـ

فقلت :

اهلا يابوريان ماغنت اطيار
وماغرد القمري بغصن وهزه

بابياتك اللي مثل لولو ومحار
من واحد جور الزمان استفزه

مايبدي الشكوى على كل بوّار
يخاف من هرج يجي فيه لمزه

يشكي طعون من غثا البين محتار
جروح عطيبة دمها بان نزه

لاباس يالشاكي ولا باس يالبار
اصبر لعل الرمح يشفيك ركزه

اصبر لعل الحظ ياقف ويندار
ويصير لك صولات عز ورزه

ترى الزمن من ماضي الوقت غدار
قد قالها قيس مع كثير عزه

وليّاك تنسى تبتهل وقت الاسحار
كل الذي تحتاج لله دزه

ترى الغنيمة والسعادة بتذكار
ربك لعل الله يعطيك كنزه

عبدالعزيز الضويحي ابوعبدالله
السبت ١٤٣٧/٤/٦هـ

الشبيكي يرد على ابيات الضويحي بقصيدة

قال الشاعر فتى مرات -ابوناصر الشبيكي: 

تحركت مشاعري مع  هذين البيتين والَّذَيْن يمثلان قصيدة كاملة صاغها الشاعرالفذابوعبدالله وفيهااسم(مرات ) وماأدراك ما(مرات) فجاريته:-

يامرات العز ياملهمة كل الهواة

منبع للشعر وانتي أمل للحالمين

فيك سحرً قالته للملا عنك الشفاة

وترجمه كنْه الطبيعة لكل العاشقين

يشهد الله للمطر والمطر سرالحياة

يحيي الأشجار باذنك إله العالمين

كل مافي الكون يارب  تنقصه الحلاة

لين تنزل رحمتك وانت ريف القانطين

ثم تهزالأرض وتربو وتَخْضَرّ الفلاة

وتنبت الأزواج  تبْهَجٍ عيون الناظرين

وديرتي تلبس ثياب الْفَرَحْ كنها المهاة

دارنا دار السعد من عصور الغابرين

من قبل عصرالنبي والصحابة والولاة

دار عز ماعبثوا  في  حماها العابثين

هلَّل بن سعود نادى وحَيَّا بالصلاةَ 

ناصر الإسلام  وَقَّفْ  بوجه الحاقدين 

حاكمً وَحَّدْ بسيفه وخيله والرماة

دولته رحمه  من الله وكاد الحاسدين

وطهَّرالبيتين من رجس وادناس العصاة

وايَّدَه ربّه وشعبه وكل الصالحين

يارجانا انصر ملكنا على كل البغاة

سَيّدِي سلمان سِيْدي وسِيْدالحازمين

طغمة الحوثي وصالح وفارس والعتاة

وزمرة الإلحاد في روسيا من الغاصبين 

مع سلام الله على المصطفى وأزكى الصلاة

النبي وآله وصحبه عِدَاد الساجدين 

 

فتى مرات ابوناصر

لامية مرات

القصيدة بصوت المبدع ناصر الراجح في برنامج الخيمة الشعبية

ما اجمل مرات ..و ما اجمل الحديث عنها ..والبوح بما تود ان تقوله عنها..

الى مرات التاريخ ..مرات العراقة.. مرات الادب ..مرات الكرم..مرات الاهل والاحبة ..اهدي هذه القصيدة:

سلام يا دار الحسن وارض الجمال

سلام يادارا وفت لعيالها

عروس كل الوشم كاملة الخصال

ديرة مرات الله يطيّب فالها

ديرة مرات وقدرها فوق الخيال

ابوي عن جدي قديم قالها

انشد عن الضلع الحمر شيخ الجبال

كميت كانك جاهلا منزالها

ذاك الجبل قدره عظيم ولا يزال

علامة تبقى بمر اجيالها

جنوبه الخبراء قراح الماء الزلال

يازين مشربها و كثر افضالها

فيها المزلّف و اثلها ذيك الطوال

كم شاعرا بحداه قد غنى لها

يوم البرايا همها جمع الريال

مرات معروفه ببذل اموالها

من طيب اهلها بالكرم يضرب مثال

من ماضي الازمان هذا حالها

مشهورة بالعلم والراي العدال

سجّل لها التاريخ صدق افعالها

نعمن بها نعمن بها في كل حال

الله يجملها ويحمي جالها

في ظل حكام الحزم نعم الرجال

ابوفهد صدّر قرار شالها

سلمان بن عبدالعزيز اعطى الجزال

الله يديمه راعيا لاجيالها

الحاكم اللي سيرته عنها يقال

نهج الصحابة يقتدي باقوالها

يالله عسى عمره به سنين طوال

سلمان سلمان الحزم خيّالها

عبدالعزيز بن عبدالله الضويحي

ابوعبدالله -محافظة مرات

الخميس ١٤٣٧/٣/٢٧هـ

#############

تعليقات لابد من ذكرها

#############

إبداع وطني يشدك إلى مسقط الرأس حبيبتنا مرات..مبدع ياأبا عبدالله دائما حفظك الله..كيف لا ووالدك الأديب والمؤرخ حبيبنا أبوعبدالعزيز..حفظكم الله..ووفقكم..

إنتماء للأرض للتربة للأزقة للسوابيط لكميت لمرات الحب..

الاديب نديم كميت -الاستاذ الشاعر حمد الدعيج ابومشعل

####################

صح لسانك أيها الشاعرالمتقدوالمتجدد شعراًوالذي  دائماًمايتحفناماشاء الله تبارك الله وليس بمستغرب على مثله فمن قبله والده وأجداده فهو امتداد لمكارمهم أسأل الله له التوفيق دائماً لقد تغنى بأحب المدن إلى قلوبنابعد (مكة المكرمة )و(المدينة المنورة) إنها (مرات الحبيبة مسكين الي ماعنده مرات)تستاهل هذه المدينة الغالية كل خير هي وأهلها الكرام التي زرعت الحب والكرم في نفوسهم

هذي مرات الي تغنى بهامن عشقهافي ماضي الايام  أو حاضرهاحقاًإنها تستحق كل هذا العشق والحب والوفاء والذي خصه بها أحد أبنائها البررة وفقه الله والذي يسبقنا دائماًإلى الوفاء لها بحقوقهاعلينافشكراً له من الأعماق

فتى مرات.الشاعر الاستاذ محمد بن عبدالحكيم الشبيكي- ابوناصر

######################

بدعت ،،، وابدعت ،،،صح لسانك نعم هذه القصيده تسجل في تاريخ مرات بل تكون من عناوين مرات في كل ذكرى او سالفه ،،،

احسنت واجدت دائما في انتظار مثل هذه الروائع ،،

سلمت اباعبدالله&&&&

الشاعر الاستاذ علي بن حمد الدعيج -ابوحمد

################

يابن ضويحي من صناديد الرجال ،،

جبت البيوت اللي صدق من قالها ،،، 

مرات دار للكريم امن العيال ،،،

تاريخ مكتوبٍ بطيب اعيالها ،،،

نحبها حب الوطن فيها حلال ،،،

ونحب فيها شمسها وظلالها ،،،

محمد الدايل( ابو ابراهيم )

لك  وللجميع تحياتي وتقديري ،، محبة مرات تجمعنا ،،،  وهي جزء من الوطن الغالي وحب الوطن من الايمان

الشاعر الاستاذ محمد بن ابراهيم الدايل-ابوبراهيم

#######################

قصيدة الشاعر عبد العزيز الضويحي رائعة وجميلة صح لسانك اقترح طباعتها وتسليمها للجنة الاحتفالات لتكون عرضتنا الجديدة ان شاء الله في اقرب مناسبة

الاستاذ دعيج بن محمد الدعيج - ابومحمد

رئيس المجلس البلدي بمحافظة مرات سابقا

#######################

((رجل الاخلاق))

((رجل الاخلاق))

في فجر الاربعاء ١٤٣٧/٣/٢٦هـ بعد ان قال الشعراء والمتذوقين ماقالوا من تعليقات على قصائد وردت بالامس في مجموعة شعراء مرات

رأيت ان الشاعر الخلوق  ابوناصر الشبيكي (فتى مرات) بتواضع معتاد قال بعد ان اثنى و شجع كالمعتاد من قلمه الرائع..عاد مرة اخرى وقال:

آسف تأخرت في إشادتي بكم
وأكرر أسفي لكم جميعاًعذراً

ثم عاد مرة اخرى بعد الردود التي يستحقها وقال:
لاوالله كلكم تستحقون الإشادة
وهذا فخر لي أن أشيد بكم لأنه
يعلي من شأني لعلو شأنكم و
جزاكم الله عني خيراًلجزاءورفع قدركم آمين

فماذا عسانا ان نقول تجاه هذا البحر المتلاطم من التواضع والاخلاق سوى ان نرفع ايدينا لله داعين له ثم قلت :

اللهم في هذه الساعة اشف عبدك ابوناصر والبسه ثوب الصحة و العافية اللهم انا قد احببناه فيك وقد غمرنا بحبه و طيبه اللهم اجعل ما اصابه رفعة لدرجاته وتكفيرا لذنوبه

امين

ثم رد الشاعر فهد المجيول:

امين ياللي بالدعاتطلب كريم&
من حبه الله ياولدياقف معه@
يبقى مع اللي يعرفه دايم حشيم&
ماشفت مخلوقٍ وربي ضيعه@
واخوي ابوناصرنبي ندعي العظيم&
له بالشفاونرجي الله يسمعه@
#################

ثم رددت على ابومحمد :

اشهد انه يافهد رجل عظيم
دايم فيه التواضع ماروعه
نحشم اللي بالورى طبعه حشيم
ابوناصر كل حسن جمّعه
شاعر وباخص ولد عبدالحكيم
طبع ابوه اللي عطاه ورعرعه
فتى مرات الشيخ والحر العديم
جعل ماصابه طهور و يرفعه

عبدالعزيز الضويحي-ابوعبدالله
#################

ثم رد الشاعر عايض الدعجاني

الى اخي وعزيزي محمد عبدالحكيم الشبيكي (فتى مرات)
دام الدعا مخ العباده ياحليم
حبل الرجا من بيننا لاتقطعه
عن الولي ماستغنت عيال الحريم
وش حالنا لو الدعا مايسمعه
ندعي ونطلب رحمة الرب الرحيم
والادمي مامعه شر ومنفعه
ياحافظ يوسف ويامنج الكليم
وايوب اذ ناداك شافيت وجعه
امين ثم امين ياربي تديم
العافيه للي تكدر مضجعه
طهور ومعافى ولطفك ياعليم
الضيق تقفاه انفراجه للسعه
يارب عينك تنظر الحال السقيم
بالعافيه باقي حياته متعه
ويارب تهديه الصراط المستقيم
وبوالدينه في جنانك تجمعه
شكرا نيابه عن زميل لي قديم
عن الشبيكي قلتها وانا معه

عايض الدعجاني
الساعه السابعه مساءا
##################

طاير الدوح

🌖🌖🌖🌖🌔🌔🌔🌔
🍀🍀🍀🍀🍀🍀🍀🍀

((((طاير الدوح))))

اثر الليالي يا فتى تتلف الروح
ليل المعنّى بين وده وهاته
كثر السهر لا رافقه طابع النوح
وقامت توارد بالفكر ذكرياته
اعرف ترى راعيه مبلي ومجروح
لاتنشده وش جاه من مشكلاته
صكات بقعا وقفت له بساموح
وراحت مدايحها وصارت شماته
تبدلت من ماضي كان مملوح
للواقع الغابر بكالح صفاته
مير العوض في ملتقى طائر الدوح
بالروضة اللي كل لون نباته
يفوح ريح الروض في جوّها فوح
نسيمه ازكى عطرها في فلاته
يصير باب الصدر مشرع و مفتوح
لا سج فيها بالقدم هي طراته
يظهر دفين من سوافيه ملفوح
عصر تقضى بالصبا يوم فاته
عصرتقضى بين طربات ومزوح
ياليت ذاك الحلم طوّل سباته
لاشك ذكراها توسّم على اللوح
وتاريخها مكنون في وسط ذاته

عبدالعزيز بن عبدالله الضويحي
ابوعبدالله الرياض١٤٣٧/٣/٢٥هـ
🔴🔴🔴🔴🔴🔴🔴🔴
      (((مجاراة)))

قريت الي شعر على قروب مطروح
من الشاعر اللي تعجبك مفرداته
ابن الاديب ومع هل الطيب ممدوح
وصاه ابوه وحافظن له وصاته
ابن ضويحي طيب الراس طحطوح
الله يحقق له جميع امنياته
ماكن صدرك بينه منك منضوح
وضح لي المكتوب رمز كلماته
هيضت قلب كله الام وجروح
ولايبري الملتاع كثرة سكاته
الصمت لو انه يكفي عن البوح
تشرح معاناة الحزين عبراته
يخفي ويخفي لكن الدمع مفضوح
صعب يخفي دمعته بالتفاته
ياوقت بذيت العرب دون مصلوح
كم واحد ذاق النكد في حياته
ان قلت اله زعلان وان قلت مسموح
الوقت ماحي مسوي سواته
الادمي بدنياه لو يبعد الشوح
عساه حسن الخاتمه في مماته

عايض الدعجاني-مرات

🅾🅾🅾🅾🅾🅾🅾