(((خاطرة مغترب)))
هذه القصيدة كتبتها حينما كنت بالولايات المتحدة الأمريكية في رحلة علاجية للوالد تكللت ولله الحمد بالنجاح و في احد الايام كنا نتبادل الحديث مع مجموعة من الاحبة السعوديين و العرب حول الاشواق الى الوطن و الاهل فقلت هذه الابيات:
يا ربعنا ياللي على الدار شفقين
لي ديرة ما ظن مثلي هواها
ديرة رجال بالكرم مستعدين
ياسعد منهو باللوازم نصاها
دار الشرف و المرجلة قرة العين
دار الندى طول المدى محتواها
دار لها عندي مكانه و تثمين
لا حل طاريها يبيّن غلاها
هي درة في وسط نجد الميامين
بين الفيافي و الحزم مستواها
بوابة الوشم الجنوبي من سنين
وكميت معطيها الوسم في بهاها
تاريخها معلوم من قبل الالفين
بالجاهلية وانشد اللي قراها
اشعارهم وادابهم بالدواوين
وعند امرئ القيس التميمي نباها
والله ما ودي سوى شوفة العين
لمراة جعلي ما تعدا حماها
مرات ياليتي على كميت هالحين
متمركي واشاهدك من سماها
واشاهد الديرة و ذيك البساتين
ودار القصيبة مرتعي في صباها
وبير الوليدي و اثل ابن حفص ثنتين
مع سكة الحيطان واللي وراها
واشرب من الجفرة قراحا باليدين
الذّ و اعذب ما شربناه ماها
ونشوف اهلنا عقب ما طوّل البين
واحبابنا و اقرابنا و اقصراها
واليوم انا يالله ياقاضي الدين
طالبك تدفع ما حصل من بلاها
نبي نغادر (سان فرانسيسكو)الشين
دار الخواجة خاسرا من بغاها
ثم نتوجه يم دار السلاطين
دار السعود اللي جزيل عطاها
في دار اخو نورة فهد حامي الدين
هو خادم البيتين رافع بناها
الله يسهّل ما بغيناه عجلين
ويبدّل الله بالشفاء كل داها
عبدالعزيز بن عبدالله الضويحي
سان فرانسيسكو_كاليفورنيا
الولايات المتحدة الأمريكية
١٩٩٩/٨/٢٠م
