الأربعاء، 12 أبريل، 2017

مجاراة (يا حظ)

       ((البدع))

يـاحظ وش بـيني وبـينك من الثار.
يــومـك مـعـاندي عـلـى كــل حــزه.

لا قـلـت زان الـوقت يـاسرع مـاثار.
بــركــان جـــورك والـــزلازل تــهـزه.

ارحــم شـقـيا صـابرا كـيف مـاصار.
قـلـبه عـلـى طـاري الـمواجع يـجزه.

لابن ضويحي سقت زينات الاشعار.
الــلـي بـقـلـبي لـــه مــقـام ومــعـزه.

يـاصاحبي قـلي تـرى القلب محتار.
وش حـيلة الـلي صـار وقـته يخزه.

عـسـى ولــي الـبيت عـلام الاسـرار.
يـعـدل لــي الـمـايل وحـظـي يـرزه.

ابـــــــــوريــــــــان الــــــدعـــــيـــــج
الــــــــــســـــــــبـــــــــت ١٤٣٧/٤/٦ه

       ((الرد))

اهـــلا يـابـوريـان مـاغـنـت اطـيـار
ومــاغـرد الـقـمـري بـغـصـن وهــزه

بـابـياتك الـلـي مـثـل لـولو ومـحار
مــن واحــد جــور الـزمان اسـتفزه

مـايـبدي الـشـكوى عـلـى كـل بـوّار
يـخاف مـن هـرج يـجي فـيه لـمزه

يشكي طعون من غثا البين محتار
جـــروح عـطـيـبة دمـهـا بــان نــزه

لابــاس يـالـشاكي ولا بــاس يـالبار
اصـبـر لـعـل الـرمح يـشفيك ركـزه

اصـبـر لـعـل الـحـظ يـاقف ويـندار
ويـصـيـر لـــك صــولات عــز ورزه

ترى الزمن من ماضي الوقت غدار
قــد قـالـها قـيـس مــع كـثـير عـزه

ولـيّاك تـنسى تبتهل وقت الاسحار
كـــــل الـــــذي تــحـتـاج لــلــه دزه

تـــرى الـغـنيمة والـسـعادة بـتـذكار
ربــــك لــعـل الله يـعـطـيك كــنـزه

عـبـدالعزيز الـضويحي ابـوعبدالله
الـــــــــســـــــــبــــــــت ١٤٣٧/٤/٦ه

الثلاثاء، 28 مارس، 2017

ديرتي وكميت غير جبال طايف..لفتى مرات

{وصفوا له مير مادل الوصايف
يحسب ان كميت خشم المكمكية}
🌺🌺🌺🌺🌺🌺🌺🌺🌺🌺🌺🌺🌺
قرأت هذا البيت من الشعرولا أعلم قائله  فجاريته بهذه الأبيات لذكره جبل(كميت) لأنه غال ِجداً على قلبي هو ومن تحته وجميع ماحوله من الغالين❤
وهذه قصيدتي :-
🌹🌹🌹🌹🌹🌹🌹🌹🌹🌹🌹🌹🌹
ديرتي وكميت غير جبال طايف
هن هوى بالي صبا نجد العذية
{وصفوا له مير مادلّ الوصايف
يحسب انَ كميت خشم المكمية}
مايعرف الدرب والمسكين خايف
من لهيب القيظ وسط المهمهية
نافد(ن) زاده وصيده بالكلايف
وقربته نشَّت ومعها الزمزمية
أرخصً بدنياه وايضاًيالولايف
وبالوناسه ثمّ كيف الشاذلية
عايف(ن)للنوم مبر(ن)للحسايف
حروته عذب الغيوم  الموسمية
في غدير كميت ياحلوه  ورايف
مصدره ماطر مزون(ن)عقربية
في روابي نجد والشم النوايف
مصدر الإلهام  ياهي مخملية
حظّه الّي سَجّْ برياض(ن) عطايف
روضهن مشموس وارياح(ن)زكية
أقحوانه والنفل والحرف كايف
والخزامى  والزهور بهن  ندية
في مرات وخبتها ماله وصايف
الفجاج  وساع والأًجواء نقيه
والطبيعة سحر لوّْالجو صايف
في شعيب الشمس ياحيّه وفِيّه
مختلفْ نبته وانا بالعين شايف
الشعيب اخضر وغدرانه مليّه
مع كريمين الوفاء مامن  كلايف
ينومسونك  كلهم صافين نية
يثلجون الصدريانعم الطوايف
فعلهم يشفي والانفس حاتمية
بالوفا والطيب مالين الصحايف
والمواقف يشهدن  والنار حيّه
أنشدوا عنهم خَبَرْهمْ دوم لايف
زادهم ماكول والأيدي  سخيٌة
وياصلاة الله عدد ماطاف طايف
أو سعى بالبيت سعده واهنيّه
للنبي وآله وزوجات(ن) عفايف
والصحابة صفوة اخيار البريّة
مع سلامه عدّ همسات الشفايف
من جميع الخلق بالدنيا سويّه
وكثر مايظهر من اخبار وطرايف
بالجرايد والكتب صبح وعشيّه
🌷💐🌷
ابوناصر الشبيكي
     [ فتى مرات ]
١٤٣٨/٦/٢٥هـ

الاثنين، 27 مارس، 2017

الهوى والليل

الـهـوى و الـليل و انـسام الـغسق
والـقـمر و الـنار والـهجر الـطويل
والـشـتاء وشـباط والـهايم غـرق
فـي بـحور الـفكر مـاحصل دلـيل
بــاح ســد الـقـلب والـباب انـدلق
والـحـنايا مــن بـلاها فـي نـحيل
تـنتظر مـن صـبحها حتى الشفق
لـحـظة يـحـيا بـها الـقلب الـعليل
اشـهد ان الـصبر فـايض وانـدفق
كــل يــوم اقــزره واصـبح قـليل
مــا خـبرت الـغيم مـن يـمه بـرق
وما خبرت الارض من يمه تسيل
كـانـها طـالت عـلى نـفس الـنسق
عــزتـي لـلـقلب مــن زود الـغـليل

عبدالعزيز بن عبدالله الضويحي

١٤٣٨/٥/١٤هـ

قصيدة الدايل--بمناسبة زيارة امير الرياض ---

--بمناسبة زيارة امير الرياض  ---

يالله المعبود ياغافر الذنب الودود ،،،
خالق الاكوان ربٍ  هو الفرد الصمد ،،،
-----------
الوطن بحماك ربي امانٍ من الحسود ،،
وما يعكر صفوها لا حروب ولا نكد ،،
----------
ودام عز المملكه يا عريبين الجدود ،،،
تحت حكم اخوان نوره وحن الهم سند ،،
--------
هم هل العوجا قديم وللرايه عمود ،،
هم على العايل سعير  وفي عينه رمد ،،
----------
رفرفي يا راية العز في العليا سنود ،،
الله اللي عزنا فوق  ما نخضع لاحد ،،،
-----------
كلنا لك يا وطنا مع الداعي جنود ،،،
وانت يا سلمان روحه وحنا له جسد ،،،
-------------
يا ملكنا عزم حزمك سرى جيش وبنود ،،،
ومانداري دون عزمك ولا نذخر جهد ،،،
-----------
وماركعنا لغير رب  ولا نرضى سجود ،،،
حافظين  العهد وعد على  طول الامد ،،،
---------
سربنا يا سيدي ما تزحزحنا حشود ،،،
وتحت رايتكم مشينا وحكم  الله وعد ،،،
-------------
دار سلمان الغلا في العوالم والوجود ،،،
فخرنا وان جاء الفخر عز ما مثله بلد ،،،
-------------
في ثراك ولا اجل برك وبحرك والنفود ،،،
ما نساوم في امانك ولا نحسب عدد ،،،
-----------
حبنا لك يا ملكنا وما حده حدود ،،،
يقطع الله من جحدكم وللطيب جحد ،،،
--------------
سنة ما شين فيها ولا عنها نحود ،،،
صفحة التاريخ تكتب وتنسى من شرد ،،،
-------------
ومن رقى روس المعالي شرب احلى العدود ،،،
ويكسب الطالات فيها ويقعد من قعد ،،،
--------------
مرحبا ياميرنا بالمحبه والورود ،،،
هلت الفرحه علينا بوفدك والسعد ،،،
-------
واصل  ،، شرفت فينا عسى وصلك يعود ،،
ويا عسى  عمرك طويل ولا تشقا ابد ،،،
----------
في مرات وال دايل على جودك شهود ،،،
بشوفتك يا سيدي  صار شايبنا ولد ،،،
-------------
يوم شرفت القصر زاد  نوره بالعقود ،،،
فرحة نسعد بها اليوم ونخبر من نشد ،،،
---------
والمشاعر بارق نايض وسط الرعود ،،،
من سحاب في  حقوقه  مساييل وبرد ،،،
-------------
ياولد بندر فديتك ولاعندك يكود ،،،
كل مايشكل  عسيرٍ بعون الله هجد ،،،
------------
بالعزم والحزم تكسر ثقيلات القيود ،،،
ومن بغى العليا رقاها ومن يزرع حصد ،،،
-----------
ياوطنا كل خيرٍ من المولى يزود ،،،
من فضل ربي يزيده ومن جوده مدد ،،،
----------
دارنا  يا ماكر الطيب يادار السعود ،،،
يرحم الله من بناها واسس واعتمد ،،،
---------
محمد ابراهيم الدايل  14/ 4 /1438

الأحد، 26 مارس، 2017

صور متناثرة من مرات

تصاميم وصور من مرات


صوت و صدى..الضويحي والدعيج

🌷🌷صوت و صدى 🌷🌷
  
       ((صوت))

سلام مني لابوريان
يشكي لي الحال واشكي له

الصاحب اللي قديم ازمان
ياما بكى لي وانا ابكي له

قفت ليالي بها طربان
واليوم مافي يدي حيله

غبّر هوانا و طبعه شان
نبيك تنظر و تدعي له

عبدالعزيز بن عبدالله الضويحي/ابوعبدالله

        ((صدى))

يامرحبا بك عدد مابان.
نجم ونّور قناديله.

ازكى التحية مع العرفان.
للي الوفا دوم يبري له.

الصاحب اللي رفيع الشان.
ابن الضويحي ياحبي له.

تشكي وانا اشكي من الخلان.
راعي المحبة ياعزي له.

دايم وهو في العشق هيمان.
يكبر وتكبر مشاكيله.

والحمدلله على ماكان.
عسى المقابيل تصفي له.

عبدالله بن حمد الدعيج/ابوريان
2016/7/29

من لا يحسّب قبل يرقى نزوله

من  لا  يحسّب  قبل  يرقى نزوله
انا  اشهد  انه  غامر  بنفسه و تاه

ومن  لا  تثمّن  شيمته و الرجوله
تراك  مخطي كانها جنبك خطاه

ومن  لا  يحصّل  منطق له يقوله
اخير  له صمته ولا يكثر حكاه

ومن لا صدق في عبادته انس زوله
و  لا  تفكر  به  ولا تناقش ارياه

واصحى  المجادِل يردفك في ذلوله
حوّل  وغيرك  يبتلش به و يبلاه

واياك  تشره  كل  حزه  و جوله
الا  بمواجيب  واضحه  يوم  تلقاه

واعلم  ترى  الشرهات  دايم  ملوله
يمل   منك   الصاحب  اللي  تمناه

ومن  لا  يخطط  للمشيب وحلوله
لابد   ما   يجني   خماله  الى  جاه

ومن  لا  بداها  بالشقى ما يطوله
الا  الندم  في  منتهى العمر واتلاه

ومن لايعرف قياس عرضه و طوله
يتعب  الى من طاول الغير و اغواه

ومن  لا تزوج بنت شيخ و حموله
ترى   ولدها   ما   يسره   بدنياه

ومن لا يصون الحال عن ما ينوله
ترى  الدنس  لابد  يارد  و  ياطاه

واللي  يغار  اياك  يدنيك  حوله
من  غيرته خابت وشانت سجاياه

ومن  ضيع اوقاته بذكرى طلوله
هذاك   يبكي  ماضي  قد  تعداه

لو صاح باعلى الصوت ما وقفوا له
مثل  الذي  يطرد  سراب  بمضماه

كل  يبي  يرجع  لوقت  الطفوله
اللهُ   اكبر  يا  كثر  ما  بكيناه

مير  الزمن  مقفي  وتمشي رحوله
سبحان  من  دبر  نظامه  و مشّاه

عبدالعزيز  بن  عبدالله الضويحي
٢٠١٦/٨/١٦م

روضة القرعا..للضويحي

في روضة القرعا بدا يبرض القاع
وانا احمد الله يوم ربي كساها
عند (ام عرعر)* فايح ريحه انواع
الروض والبابونج نبته زهاها
تنعش فؤادك كل ماهب ذعذاع
والروح تنسى همها مع غثاها
مع رفقة الذربين سنعين الاطباع
نخبة رجال سعد منهو لفاها
صوت النجر مابينهم يقرع اقراع
مع شبة يجذبك موضي سناها

ــــــــــــــــــــــــــــــــــــــــ
*ام عرعر اسم الروضة القديم
ــــــــــــــــــــــــــــــــــــــــ
عبدالعزيز الضويحي-ابوعبدالله
١٤٣٧/٤/٩هـ

يا ماضي الشوق..للضويحي

ياماضي الشوق ابأ اكتبت لك معاناتي
لـعـلّي الـقـى جــوابً مـنـك بــه راحـه

راح الـعمر وانـقضى ما خذت مشهاتي
والـصـبر غـلّـق وحـالـي زادت جـراحه

عــجــل عـلـيـنـا بــــردً يــبـري اهــاتـي
والـيوم قـفل الـشَرَك عـندك و مفتاحه

لـيت الـزمن يـجمع بـماضيه الاشـتاتي
انــا اشـهـد انــه ربـيـع الـعمر وافـراحه

عبدالعزيز بن عبدالله الضويحي
السبت ١٤٣٧/٨/٢١هـ

لحظة تجلي ...للضويحي

لـحظة تـجلّي رحـت فـيها مسافات
وخـليت انـا الواقع على ما طرى له
لحظة بها نفسي توافق هوى الذات
واعـيـش فـيـها نـشـوة الـروح دالـه
وارسـم خـيال داخـل الفكر لوحات
حــتـى تـمـازج واقـعـه مــع خـيـاله
مــاكــنـي الا ســـابــح بــالـمـجـرات
صــار الـمدى عـنـدي قـريـب نـواله
تـــرى الـتٲمـل مــن كـبـار الـمـلذات
والله ومـــرنــا بـالـتـفـكـر و قـــالــه

عبدالعزيز بن عبدالله الضويحي
١٤٣٦/٥/٩هـ

صاحبي...للضويحي

صـاحبي بنشدك والساعة تدور
هي عقارب ساعتك ترجع ورى
ويـن وعدك وين هذيك النذور
اثـرهـا حـلـم حــدوده بـالـكرى
انـتـظرتك بـالـمكان الـلي تـزور
عـلني الـقى مـن اشـواقي ذرى
اتـقي بـه عـن طويلات الدهور
اه. .لـو تدري بحالي وش جرى

عبدالعزيز بن عبدالله الضويحي
١٤٣٧/٢/٦هـ

شوارد ..للضويحي

كل ما وجّهت عيني للسماء
ارتسم في ناظري ذاك الخيال
الخيال اللي على طول المدى
ما يفارقني ولا يترك مجال

عبدالعزيز بن عبدالله الضويحي

نجم سهيل ..للضويحي ومجاراة فتى مرات

يامرحبا بسهيل نجم السعد هل
يا مرحبا مع مرحبا مع تراحيب
كم واحد في مطلعه قد تغزل
حتى القمر من طربته جاوب الذيب
بشّر به اللي ينتظر ويتٵمّل
ساق البشاير جزلة للمناديب
ما مثل نجد بطالع سهيل لا حل
لا شعّت القمراء بروس المراقيب
فيه الهوى عقب السموم ٳيتعدل
وانسام ليله كنها نفحة الطيب

عبدالعزيز بن عبدالله الضويحي
مرات ١٤٣٧/١١/٢٠هــ

مجاراة

إلى الشاعرالمهم كأهمية سهيل
أهديه هذه الأبيات المتواضعة
🌹🌹🌹💦🌹🌹🌹💦🌹🌹🌹
عبدالعزيزبن عبدالله الضويحي
               🌼🌺🌼
الشاعراللي كنه سهيل الى هل
عالٍ مقامه شهم راعي مواجيب
يطرب قصيده ماحدٍ منه ابد مل
يعجبك نظمه فيه فن وتعاجيب
مثل المطر دايم مباركْ والى حل
بارضٍ كساها زاهرًفيه اعاجيب
              💐فتى مرات💐
محمد بن عبدالحكيم الشبيكي

مجاراة يوم الوطن الـ٨٦


بمناسبة اليوم الوطني الــ٨٦لعام١٤٣٧ۿ
اقول:

يوم  الوطن  يوم  عزيز و غالي
نجدد  البيعة  لابوفهد سلمان

اللي   بعزه   عزنا   دوم  عالي
الله يديمه حاميا كل الاوطان

عبدالعزيز بن عبدالله الضويحي
محافظة مرات
١٤٣٧/١٢/٢٠هــ
&&&&&&&&&&&&

ست وثمانين عام وعزنا عالي
طول الدهر يبقى على مر الازمان

دون الوطن فدوه حلالي ومالي
ياديرةٍ كلك. مزايا وإحسان

محمد السكران-مسكه

&&&&&&&&&&&&&&

حق علينا نفتخر بالرجالي
اللي لهم في الدار مجد وعنوان

أل السعود اللي سمو بالمعالي
عبدالعزيز موحد كل الاركان

صالح الضويحي-مرات
&&&&&&&&&&&&&&&

مليكنا اللـي بالحـزم مايبالـي
لاقال قولٍ يفعله طيرحوران

له هيبة عند الخصم والموالي
واللي نوانا بشر خايب وخسران

عبد الله  الضويحي(أبوسامي)

&&&&&&&&&&&&&&&&

راس السعودي دايم الدوم عالي
و في يومنا نفخر جميعا بسلمان

راعي الحزم والعزم اول وتالي
ويبقى وطنا شامخ طول الازمان

اصفر وازرق - محافظة مرات
       ٢٠ / ١٢ / ١٤٣٧هـ
&&&&&&&&&&&&&&&

لاجا ذكرسلمان حالي ومالي&
فدوه لجل عينه وفدوه للوطان@

حناهل التوحيدلاجا المجالي&
فناالمجاهدوافتخرعز وايمان@

يالله طلبتك ياعزيزالجلالي&
تحمي بلادالشرع من كل شيطان@

فهد المجيول-ابومحمد
&&&&&&&&&&&&&&

ياكثرمافي القلب ترجمه قالي
ليوم الوطن يامسندي عندناشان

وسلمان يافخرالوطن مانبالي
نبذل لك الارواح يااعز إنسان

محمد الشبيكي - ابوناصر
١٤٣٧/١٢/٢٠هـ
&&&&&&&&&&&&&&

الشعر في حضرة جنابه يقالي.
حب الوطن في ذمتي ماله اثمان.

العمر يرخص له ولو كان غالي.
يحفظه رب البيت ويعز سلمان.

عبدالله الدعيج-ابوريان

&&&&&&&&&&&&&&

يوم الوطن عز بنوه الرجالي
بقيادة معزي غدى الدار بأمان

واليوم وصل الدار حد الكمالي
أمانةٍ تسلسلت عند سلمان

ناصر الضويحي - بوسارة
          عودة سدير

&&&&&&&&&&&&&&

باعطيك ردي يوم جالي مجالي
في يوم يفرح به كريمين واعيان

يوم الوطن ماهوب يومٍ يشالي
بابيات تكتب ينطرب فيه طربان

يوم الوطن عز وفخر وابتهالي
ونجدد البيعه لابو الحزم سلمان

اسمي حمد وانا سعودي موالي
ثابت ولاي وماتشتت من ازمان

حمد الشبيكي -ابومحمد

&&&&&&&&&&&&&&

ليوم الوطن بين الضلوع إجتوالي
طول الزمن يبقى على الصدر نيشان

ذكرى المؤسس خالدة  للتوالي
بدار السعود الي لها المجد عنوان 

ابراهيم المجلي -أبو فارس

&&&&&&&&&&&&&&
يوم الوطن يوم الفخر والمعالي
الحق واضح مايبي معه برهان

فرحة وطن ولا نهاب الملالي
والعاصفة تكبت قليلين الايمان

خالد ضويحي الضويحي-المدينة

&&&&&&&&&&&&&&

غالي وتبقى ياوطن دوم عالي
في ضل حكام لهم بيننا شان

روحي فداك ولجلك ارخص عيالي
في ساعة للحزم لاصاح سلمان

محمدالبخيتان-مرات
&&&&&&&&&&&&&&

ابو فهد سلمان سيد الرجالي
الله يعزه شامخ دوم له شآن

عز الوطن يحفظه رب الجلالي
من شر حاسد من حقود وعدوان

محمد الضويحي-المدينة

&&&&&&&&&&&&&&

بيتين ما تكفي ولو هي جزالي
في مدح دار خصها الله بالايمان

مدلوقة البيبان خير وحلالي
يجني ثمرها اللي بعيدين الاوطان

للطيبين امزون وبله همالي
ولاهل الردى تسفي سموم ودخان

من طاب طبنا له بليا تعالي
وخل الملالي ما حسبنا لهم شان

حب الوطن ماهو بيوم وليالي
في اقلوبنا واحفادنا دب الازمان

محفوظ من ربٍ عزيز الجلالي
امن وامان وعز في ظل سلمان

سعد  المجلي - ابوحمد

&&&&&&&&&&&&&&

شان الزمان ....للضويحي

شان الزمان وكّدره بعض الاحداث
اللي  استجدت  بالسنين  الحديثة
من  قبلها  والناس مافيهم انكاث
انفوسهم    للخير    دايم   حثيثه
تسوقهم   يم   المساكين  و  يغاث
ذاك الضعيف وحظ من هو يغيثه
وزود   على   هذا  طبايعهم  ادماث
يمينهم  تصدق  و  لا  هي  حنيثة
مجسّمين   المال   يعطى  بالاثلاث
ماحسبوا    كم    باقي   للوريثه
ما   طاردوا  ربح  مع  الناس  لهّاث
واللاش  يشقى  به ونفسه غثيثه
يصر   ماله   عن   ذراريه  بخباث
ماطاعته   نفسه   بلاها   خبيثه
هو  ما  درى  انه يجمع المال ميراث
يفرح  به  الوارث  ويحصد  حريثه
يمدها   اللي  حاسب  يوم  الاجداث
عجّل   حقوق  الله  ما  جاه  ريثه
يرجي   بها  الفردوس  لعله  يغاث
ومصدق   قول  الرسول  و  حديثه

عبدالعزيز بن عبدالله الضويحي
١٤٣٨/١/١هــ مرات

ازهر نبات الوشم...لنديم كميت..وجواب المؤرخ الضويحي


(( أزهر نبات الوشم ))

بمناسبة عودة الأخ والزميل والصديق العزيز (( ابو عبدالعزيز )) عبدالله بن عبدالعزيز الضويحي من رحلته العلاجية والتي تكللت ولله الحمد بالنجاح إنداحت مشاعري فرحة بمقدمة الميمون ......

أزهر   نبات  الوشم  من  قبل  حله
وأورق شجر نجد  العذيه بالأطياب
يوم   التفت  وقتي  عشان  من  له
شاف الصديق اللي له الروح تنساب
عبدالله    اللي    منكف    يم   خله
يبي  مرات  ومنوته شوف الأحباب
يكسيه    ربي    حلة    فوق   حله
ويلبسه  تاج  العافيه  والعمر  طاب
يافرحة    الديره   عقب  جاء محله
واستاسع الخاطر عقب مشكله ذاب
الله      ياقا      كل     زله     وزله
ويفتح  عليه  العافيه  باب مع باب
ماباقي    من    فرحة    العمر   لله
غير  الرجا  في  تالي العمر لو شاب
الله     يبعد    عاثر    الوقت    كله
عن  دربنا  والقلب من خوف يرتاب
والله     يبعد     عننا     كل    عله
ويبهج  قلوب  شفها  الوقت بغياب

حمد الدعيج.... نديم كميت

بسم الله الرحمن الرحيم
عندما قرأت قصيدة اخي وزميلي الأستاذ حمد عبدالرحمن الدعيج في مجلة الوفاء التي وزعتها مدرسة عمار بن ياسر الابتدائية بمرات بمناسبة تكريمي وعودتي الى ارض الوطن - كانت بعنوان ( ازهر نبات الوشم ) فهاجت مشاعري بهذه الابيات

قــريــت شــعــر صــــادق بـالـمـجـله

زفـه زمـيل مـخلص بـين الاصـحاب

صــاغـه رفــيـق وافــي لــي يــد لــه

شـوقه عـلى شـوف الـمواليف غلاب

يـسـأل عــن الـغايب ويـأصل مـحله

ويفرح الى قال الخبر صاحبك طاب

يـــدري عــن اخـبـاره دقـاقـه وجـلـه

ويشره على اللي ما يجازون الاطياب

يـاهـاجسي بـالـشعر سـلـم وقــل لـه

وفـيت مـاقصرت يـا نـسل الانـجاب

والله مــانـي بـالـشـعر مـنـصـف لـــه

قــــدره رفــيـع يـعلـمه رب الاربـــاب

والـمـدح بـالـقرطاس شـيـن ومـذلـه

ومـن حـصل الـعليا تـباريه الانـساب

عـسـى لابــو مـشـعل تــدوم الـمظله

يــاعـل مـــن ذلــه تـوطـاه الاسـبـاب

عــســاه يــلـحـق لـــذة الـعـمـر كــلـه

ولا يـشـوف الـشـر بـاهله والاحـباب

أخوك عبدالله بن عبدالعزيز الضويحي
1421/1/20

مجاراة - دار المحبين

قال عبدالعزيز بن عبدالله الضويحي
في صبيحة الاثنين ١٤٣٨/٢/٢٨هـ واصفا الحال

مبروك  يا  دار  المحبين  ماجاك
يوم الحيا غطى مرات و كساها

وبله بعالي كميت حوّل و يزهاك
دربه  مع  الخبراء  مطاليع ماها

١٤٣٨/٢/٢٨هـ

فأجابه الشاعر فهد بن محمد الفهيد

يا   جفرة   للخير   عشنا   على  ماك
يا  اللي  قلوب  الناس  حبك  غشاها

اليوم    ليتي    ما   تمشيت   بحماك
ولا شفت وش صارت عقب زين ماها

محافظة مرات

واجاب الشاعر محمد بن عبدالرحمن البخيان

وبل الوسم ياكميت من فضل مولاك
حدر على كل الشعاب  وملااها

يا اغلى الجبال الشامخه في مسماك
مرات   تزهابك   وهي بك  تباها

محمدالبخيتان
(وارث الشعر)

🌹🌹🌹🌹🌹🌹🌹🌹🌹🌹🌹

وهذا رد الشاعر محمد بن عبدالحكيم الشبيكي

ياحي قافن سطره قرمن اغلاك
هيض شجوني والمشاعر دعاها
ماتكفي البيتين في مدح شرواك
ياالجفرة الي رزقها من  سماها
من زارها أوشافها قال مااحلاك
ومن ذاق  ماها لا حشا مانساها
ياتوأمن لكميت  وباسمه  عرفناك
يااحلى  غديرن من ترابه طلاها
دور السنة ماياسن الماي بحماك
وباثلك سكاكر باالثمر من حلاها

الشاعر محمد الشبيكي
  (فتى مرات)

https://twitter.com/Abdulazizmo11/status/٨٠٣١٧٢٨٤٥٤٩٦٨٩٧٥٣٧

https://twitter.com/alfehaidf/status/803311618398502912