(((((من بوح الصباح))))))
ياصباح الخير ياريح المطر
ساقه النسناس من يم الجنوب
والندى يلمع على اوراق الشجر
ماحلا شوفه وهو منها يذوب
والسماء بالغيم منظرها يسر
اشهد ان القلب للمنظر طروب
يطرب اللي له زمان ينتظر
للحيا والمزن وانسام الهبوب
صباح الاربعاء ١٤٣٧/٤/٢٤هـ
عبدالعزيز بن عبدالله الضويحي،مرات
#################
((((((مجاراة)))))))
#################
هلا بالمبدع دائما
ياصباح العشب في مد النظر
وسط ارض الوشم في كل الخبوب
والطيور اللي على روس الشجر
والهواء نسناس ما جاله هبوب
احكر الدله على جال الجمر
ذا دواء للنفس ذا طب القلوب
الشاعر عبدالله الفرحان
################
ياصباح النور من عقب الظهر
توني اشوف ماجا فالقروب
الله يفيث العرب بدو وحضر
واعسى مايحجبه كثر الذنوب
والمطر تحيا به قلوب البشر
ماحلا الودان من غر النصوب
من خيال بان فالقبله عصر
ساقه المولى قبل وقت الغروب
ماطره ياخذ على الديره شهر
ماتشاف السارحه بين العشوب
والندى دمع على الخد انحدر
من عيون مودع الظبي اللعوب
ياصباح النور يابيوت الشعر
ويا رجال تنتهج زين الدروب
الشاعر عايض الدعجاني
#################
ليست هناك تعليقات:
إرسال تعليق