الٲخ عبد العزيز ابن عبد الله الضويحي
شعراء محافظة مرات الكرام السلام عليكم ورحمة الله وبركاته
اعجبني ماكتبه ابن الٲديب عبد الله الضويحي عن البر والمكشات
وهذي مجاراتي له واعتذر عن التقصير
--------------------
هيه ياللي تطري الكشته شفاوي
الوسم هبت نسايمه العذية
********
ولّم العزبة ورافق كل هاوي
من قروم تشفي الحال الردية
********
من عيال (مراة) غايات المناوي
كاسبين الطيب والكف الندية
********
اشهد ان البر لولاهم شقاوي
وارثين المرجلة واهل الحمية
********
ثم توجه يم هاذيك الخلاوي
انحر المروت والا المكمكية
********
حزة مسيّان قبل الليل ضاوي
افرش بساطك وخل النار حية
********
انعش اللي تطربه ريح القهاوي
واحمس وبهّر وصب الشاذلية
********
واضبط الشاهي على جمر غضاوي
منوة اللي يكرهه من زمزمية
********
ثم لاجاء الليل بانت للهواوي
بالسماء نجمه و قمراء بالسوية
********
مع خوي يرفع الشيلات غاوي
له مزاج في مزاجك له مزية
********
واجتمع هذا وهذا بالتساوي
طابت افكارك وجاء للفكر هيّة
********
ليلة ما مثلها لو بالهقاوي
وانشد اللي حار ما قد شاف زيه
********
سافر وناظر ولا حصّل مداوي
يبري جروح على قلبه خفية
********
كود شوفة روضة القرعا نداوي
فايح ريحه كما اطياب زكية
********
اسأل المعبود دفّاع البلاوي
تسقي المروت يالله يا وليّة
********
********
عبدالعزيز بن عبدالله الضويحي
ابوعبدالله
الرياض ١-١-١٤٣٧هـ
***********
--------------------
اقول :
لبيه لاجاءمن هل الطيب هاوي
يطري عليه كميت والمكمكيه
ياوجد حالي شاق شوق لهواوي
على نسيم البر وريح النديه
طالبك ياالمعبود حقق مناوي
مزن يغيث الدار سيل برديه
تحيي بها الشعبان وارض خلاوي
وخبوب طاريها على البال حيه
يازينه المكشات لاصرت هاوي
وموترك شاص مجهز وله مزيه
يضرب طريق البر وين انت ناوي
على مرات العز وهل الحميه
فيهم رجال طيبهم بالتساوي
اهل كرم والطيب والشاذليه
(نوره بنت حسن المشخص)
الرياض يوم الخميس ١٤٣٧هـ
ليست هناك تعليقات:
إرسال تعليق