بقايا الذكريات

مريت   ذيك  الدار   وارخيت   القدم
تو الشفق غايب عقب فرض العتيم
لي  مدة  عنها  و  قلبي  ما  سقم
عشرين  عاما  فوقها  عمر الفطيم
دارا   لها     عندي    مقام  محترم
مع   ذكريات  عشتها  فيها  و  اهيم
اهيم   مثل   اللي   يجاوب  له  نغم
لا  من  طرى  لي  ذكر  هذاك النديم
اللي      ينادمني     بحزات     العتم
يالله   ترحمها     وتسكنها  النعيم
ماعاد لي   غير   التفكر   و   الالم
مع   ذكريات   كلها   راحت   حطيم
تغيرت     كل  الشواهد    وانصدم
فكري  من  الواقع  غدا  كنه  غشيم
ياليت   ما   مريت   من  قبل  الندم
و اقفيت  ما وقفت والممشى هميم
ياحظ   من  كانت  له  الذكرى  عدم
انا   اشهد   انه صاحي ما هو سقيم
ابنشدك      يابوي      يارمز  الكرم
يالباخص    البيطار   يالحر   العديم
حيثك    فيهم    بالمعاني    والحكم
لك  في ذرى التاريخ محراب قديم
ويش    الذي    غيّر   زمنا   وانصرم
جيل   من   الاحباب   قفوا  للرحيم
المشتكى    لله     ربي     قد   علم
سبحانه   الرحمن   ما   غيره   عليم
عبدالعزيز بن عبدالله الضويحي
١٤٣٩/٨/١٠هـ