&&& الله يرحمك يا محمد ولد خالد &&&
((((قصيدة رثاء في المرحوم بأذن الله
الخال محمد بن خالد الدعيج))))
اعزي النفس قبل اعزي الوالد
و امي كفاها من اللوعات ماجاها
علم لفاني وقلبي للخبر جاحد
واثبت لي ابوي قوله في ثناياها
الله يرحمك يا محمد ولد خالد
جت لك وفاتك على ماكنت تبغاها
عقب صلاة العصر وتسبح الواحد
ويديك تحسب وبلسانك تقفاها
جاك القضاء بالرضا في رفعة الشاهد
في روضة المسجد اللي ما تعداها
انا اشهد انه قضى زمانه مجاهد
نفسه على ما يضد الدين يعصاها
يقضي جميع الليالي دايما ساجد
وانا اشهد ان سيرته بالدين مبناها
خال ورفيق(ن) حبيب وللعلا ناشد
ما يمشي بدرب الا عارف اتلاها
هو دالق الباب والمسكين له قاصد
ويعطي الشور لا من غاب معناها
عصامي(ن) عاش بالدنيا وهو صامد
قليل من عاشها مثله وعداها
يالله تغفر ذنوب الراجي الزاهد
اللي شكى مدة(ن) من حر بلواها
مع كل ما قد جرى له صابر وعابد
وحبل الرجاء بالولي ما يوم طوّاها
عبدالعزيز بن عبدالله الضويحي
١٤٣٦/١٢/١هـ
مرات
ليست هناك تعليقات:
إرسال تعليق