القصيبة ..ايضا
وقت الضحى اغليه من بد الاوقات
اقضي به احلى حزة في حياتي
مهوب دايم،،بس وقت الاجازات
في ديرة بالوشم فيها شفاتي
فيها الذهن يصفي مع النفس بالذات
و فيها يطيب الشعر نظم ثباتي
ذيك البلاد الوادعة واسمها مرات
جنوبها الشرقي عليها طراتي
يم العلاوة و الحبوس القديمات
لا دجت فيها خاليا هي غناتي
وتاخذني اقدامي شمال وعجلات
يم القصيبة حاضنة ذكرياتي
اروح اشوف ان كان باقي علامات
من ماضي عشته غريرا و فاتي
وبيت بناه ابوي يشهد بما فات
اقف على بابه و اعيد اسنواتي
ذيك السنين اللي سكناه عجلات
يا زينها لو ما مضت مسرعاتي
واقلّب التفكير حزن و طرابات
ليت الزمن يرجع وما راح ياتي
جاء للقصيبة عز ..لا وا حسافات
راحت كما حلم حواه المباتي
عبدالعزيز بن عبدالله الضويحي
١٤٣٨/٤/٢٦هـ
ليست هناك تعليقات:
إرسال تعليق