((وصل الارحام))
احرص على وصل الاقارب و الارحام
كانك تبي دنياك دايم سعيدة
ولا توانا واحسب حساب الايام
قبل الفراق وقبل دفن الفقيدة
دفن القريب اللي نسيته من العام
و مفارقه فالقلب يقطع وريده
بادر بوصل يكسر جدار الاوهام
بينك وبين اللي ضعونه بعيدة
ولا تطاوع كل قاطع و نمام
الكاذب اللي ما صدق في وعيده
هذاك لوقي وصله لبعض الاقوام
والبعض الاخر تاركه ما يعيده
قد حط لانواع البشر عنده اقسام
حسب المصالح والهدف والحصيده
راحت حياته مع عوانيه بخصام
ما يدمح الزلات نفسه عنيدة
عليك بالصامل وبالواصل العام
يرجي من الله بالوصل ما يفيده
اقاربه عنده عزيزين و حشام
حتى ولو هم من بعاد البديدة
ما تلحقه شرهات نذل و لوّام
نفسه عزيزة والتواضع يجيده
محصل قولة نعم بين الاعمام
وايضا خواله خابرينه وليدة
وترى العمر ينقص وتزداد الاعوام
ومات المسوّف ما وصل من يريده
عبدالعزيز بن عبدالله الضويحي
محافظة مرات ١٤٣٨/٣/٢هـ
ليست هناك تعليقات:
إرسال تعليق