الثلاثاء، 10 مايو 2016

الخوّة اللي مالها من مثايل

تلقيت اتصالا ودي حميم من الشيخ عبدالله بن مساعد الدايل ولم يترك عبارة من الثناء الا واسداها لي نظير قصيدتي في اخيه العم ضويحي بن عبدالرحمن الضويحي.
فلم ارى وفاءا كوفاء ابومساعد. فقد سطر اجمل كلمات الإخاء تجاه اخيه ضويحي الذي لم تلده امه والذي يستحق كل ماقال فيه ابومساعد
فأستنجدت بالشعر لعل وعسى ان يظهر القليل لما تكنه نفسي امام بحر الوفاء وان شئت فقل محيط الاخاء.
ادام الله المحبة بين الجميع

للشيخ عبدالله بن مساعد الدايل اسوق هذه الابيات المتواضعة :

ما اقدر اوصّف موقفك يابن دايل
صعب على كل القوافي تجاريه
سمّعتني حكي الوفا والجمايل
بضويحي اللي لك زمان مخاويه
انا اشهد انه فاز بأخو الفضايل
ابومساعد يا عسى الرب يحميه
الخوة اللي مالها من مثايل
مضرب مثل كلً يقوله ويرويه
راعي النقاء والجود تشهد قبايل
ما مثل عبدالله تعدد حسانيه
شيخ ورثها من كبار الحمايل
شيخ مشى درب عسيره مراقيه
درب المراجل مسلكه بالدلايل
واكبر دليل انه نجح في مساعيه
ابومساعد فاق كل الاوايل
في حاضر التاريخ و الا بماضيه

عبدالعزيز بن عبدالله الضويحي
الرياض ١٤٣٧/8/3هـ

رد الشاعر  محمد البخيتان
مجاراة لقصيدة الشاعر 
عبدالعزيز الضويحي
في مدحه لسعادةاللواء متقاعد
عبدالله بن مساعد الدايل
ابومساعد

مع اعتذاري الشديد للشاعر
ولأبومساعد
في التقصير

يوم  الشعر  غنى  بزين  المثايل 
في  شيخ قومٍ صعب منا نوفيه

ابو مساعد  قرم  من  نسل دايل
تاج الفخر والعز من بين اهاليه

انا  اشهد  انه  للثقيلات  شايل
راعي الفعول الطيبه في مباديه

محزم    وفا  ومعدل   لكل  مايل
ياسعدمن ينصاه يلقى هقاويه

تعجز على مثله بنات الأصايل
تجيب  مثله  بالفعايل  يجاريه

شيخ علم  واشهر من جبال حايل
انشد   وتلقى  به  علوم  تعليه

يعل   من   رباه   يكفا   الهوايل 
ابوه وامه نعم مااطيب مجانيه

وعساك ياشيخ الوفا والجمايل
تبقى  لنا ذخر الزمان وطواريه

وصلاة  ربي  عد  مزن الهمايل 
على  النبي  وعد ماسال واديه

محمدالبخيتان

****************

قصيده مجاراة للشعراء 
الشاعرعبدالعزيز الضويحي
والشاعر ابن العم / محمدالبخيتان
في مدح سعادة اللواء
عبدالله بن مساعد الدايل ابومساعد
الذي تربطني به علاقة طيبه
وزميل عمل 
وكان نعم الزميل والصديق
وعندزيارتي للشاعر محمدالبخيتان في منزله
اطلعني على القصائد 
فكتبت مجاراة للقصائد
وهي قليله في مثله 
وأرجو العذر منه


سـلام يا دارالـوفـى والـجـمـايل
سـلام لاأهل كمـيت واللـي حـواليه 

محلى القصيداللي زهى بالرسايل 
ومضمونه الصـادق هو اللي محليه 

تسلم يمين اللي مـدح شيخ دايل
ابو مـساعــد حـي ذكــره وطـاريه

نسـل  الكــرام ملطـمـت كـل عـايل 
زبن الـدخـيل وراعـي الحـق توفيه


لـوننظـم ابيات الشـعـر  والـمـثايل 
عـبــدالله  الـدايل  ابـد  مـانوفــيه

حـرٍ  سـمى  في  عـاليات  الطــوايل
حـاش  السـعـادة  والمـعـالي  بياديه

اللـي  علـى  نـهجــه  رجــالٍ  قـلايل 
جـعلـه  لمـن  يرجـيه  ربـي  يخـلـيه 

وشاركـت لجـل امرين  والشـك زايل 
جـزل  القصـيد  ورجـل فالله  نغـليه 

خالد بن عبدالعزيز الفايزالناصري التميمي
ضابط متقاعد

هذه الأبيات مجاراة لأبيات الشاعر:
عبدالعزيزبن عبدالله الضويحي 
في مدح سعادة اللواء الشيخ : 
عبدالله بن مساعدالدايل. 
حفظه الله.

لاهان من هو صـاغ زين المثايـل
سـمعت ماقاله وحـبيت أجـاريه

فـي مـدح شيخ يستحق الجزايل
أبـومســاعـدكـلنا نفـتخرفـيه 

راعي العلوم الطـيبه والفضايـل
ومهما نـقوله فيه ماظن يكـفيه

كف الندى والجودوافي الخصايل
يثني عـليه الكل لاحـل طاريـه

كم قـد توجّـه وارتكـى للثقايل
وكم مرةٍ قد حقق الله مسـاعيه

فيه التواضـع والسـماحـه دلايل
وبشاشته مع كل مـن هو يحاكيه

وهــذي تراهـا مـيزةٍ بابن دايـل
عسـاه دوم بخير والرب يحـميه

مع تحيات( أبوسامي الضويحي ) )

ليست هناك تعليقات:

إرسال تعليق