. ((((نجوم المجرة))))
يا صاحبي ماعاد فيها مسرات
من يوم ما غابت نجوم المجرة
ذيك النجوم اللي عليها الحسوفات
قفت وخلتنا على حين غرّة
اثر الزمن ياصاحبي فيه دورات
تخلف قوانين الهنا و المسرة
منول قد جالهم فيه و جولات
يوم السعد قايم و هي مستقرة
مبطحين غروب دنيا بسلوات
ليت الغروب بشغلها مستمره
واليوم لا طاري ولا فيه هقوات
غابوا وخلوا كل خير وشره
وفكرت بالدنيا و شفت الهوالات
ومن عاد فيها الفكر لازم تفره
وخذت الخلاصة بالدروس المهمات
مثل البحر لا غصت واعطاك درة
خلك مع الباري جزيل العطيات
واترك طريق ابليس بالك تمره
ترى مطيع النفس تاتيه الافات
كم واحد قد شاف منها المضرة
الرابح اللي صان في كل الاوقات
فرضه وعرضه مايجيه التشره
ومع والدينه ما يحسب الكلافات
مطلق حجاجا راهيا ما يصره
البر فيهم فرض مابه جمالات
ودين على مر الدهر فيه كره
دين يسدد قبل حين النهايات
يشوف بعياله كما كان بره
اقولها وانا حريص على الذات
لعلــنا نحـضى بلله دره
عبدالعزيز بن عبدالله الضويحي
الرياض-١٤٣٧/٧/١٨
ليست هناك تعليقات:
إرسال تعليق