من الارشيف 1412هـ
قالت علامك ترتجي طلعة سهيل
وش ميزته وش يفرقه عن نجومه
تنشد وهي تدري بليل التعاليل
تبي تهيضني و انا ابعدت حومه
قلت الهوى بسهيل ينقاد بالليل
ياتي عقب ذيك السمايم نعومة
يفرح به الحسّاب واهل المحاصيل
واهل الصحاري يفرحون بقدومه
قالت كلامك فيه نقص وتقليل
وفيه السياسة واضحة و معلومة
لا تحسب اني فيك عندي مجاهيل
ما قلت كل الواكدة من علومه
قلت انشدي وانا عليّ التفاصيل
ما دامها ردت بنفس جزومة
قالت وهي تغضي بذيك المضاليل
وبصوتها الهادي من الود لومه
سهيل تذكار المحبين بالحيل
ودي تنادمني الى حان يومه
نذكر زمان فات فيه البهاذيل
يازين ذيك البهذله لو نرومه
صعب نبدل واقع الحال تبديل
الا ان نعيش بمابقى من رسومه
قلت المولع عيشته دوم في ويل
ذكراه نجم سهيل تجلب همومه
عبدالعزيز الضويحي ـ ابوعبدالله
ليست هناك تعليقات:
إرسال تعليق