((مجاراة شعرية))
الى الخال وابن العمة و الاخ الاكبر والصديق الصدوق
الى الشاعر عبدالله بن محمد الضويحي ابوسامي
ارسل هذه الابيات
مني لابوسامي جزيل التـــحايا
الشاعر اللـي بالمهمات ناصــيه
له نظرة الناقد بكل المزايا
وكل على ما قال وده يجاريه
ابيـــــات شعره وافيات ملايا
قاف اصيل يطرب اللي يشاكيه
نشكي عليك الحال من ذا الرزايا
عم البلاء بالشعر محد يدانية
من عقب ما كثرو عليه الرعايا
صار المعزب قهوجي عند راعية
وانت البخيص وفاهم بالنوايا
شاعر و راوي والدواوين تدعيه
وش رايكم باللي يعسف الحكايا
وابيات شعره ضايعه مع قوافيه
واللي يغـره جـاهلـين البرايا
هذا يصفق له وهذاك يهديه
الموجب اني شفت بعض القضايا
وصديت عن باب الزعل والمشاريه
عبدالعزيز عبدالله الضويحي
الرد
هذه القصيده رد على قصيدة الشاعرالمبدع/ عبدالعزيز بن عبدالله الضويحي( أبوعبدالله )
واقول له مشكور ونا خالك على شعورك الطيب تجاهي وتقبل مني هذا الرد المتواضع.
يامرحبا ترحيب صادق نوايا
بالحق ياخذمن عميله ويعطيه
بالشاعراللي خصني بالتحايا
لولاالمحبه كان ماارسل قوافيه
ابيات شعره بالجواهر مﻻيا
والفن فيها بينات(ن) مواريه
يشكي علي اطباع بعض البرايا
اللي عثوا بالشعر مافكروا فيه
واقول عشنا ثم شفنا البﻻيا
الله يخارجنا من الشك والتيه
اصبرشوي(ن) ثم يصبح حجايا
تلقى العجايز تالي الليل تحكيه
ومثلك وناخالك يحل القضايا
فيك ابركه ماظن تحتاج توجيه
طنش تعش ﻻتستمع للحكايا
واللي تنوشك غيرته لاتماشيه
ارفع مقامك عن خبيث النوايا
اللي ليا رافقت بان الخلل فيه
واصدح وشعرك ﻻيجي به خطايا
من شان ماتكثر عليك المشاريه
واعرف ترى خالك تجيه الوشايا
ولوعات بقعى بعض الامرارتكويه
ماعرق له جبهه وعض الشفايا
قافه ترى من فضل ربي مكفيه
مع تحيات (أبوسامي الضويحي)
9-9-2014
ليست هناك تعليقات:
إرسال تعليق