شفت المطر وش كثر طشه على القاع.
حبي يوازي كثر حبات طشه.
لحبك انا شاري ومانيب بياع.
ولاني من اللي مع رفيقه يغشه.
اقولها والقلب في حبكم ضاع.
تحيا عروقه لويجي منك رشه.
ارحم حبيباً ساهر الليل ملتاع.
من صدكم صار العقل فيه وشه.
اسمع لبعض القول يازين الاطباع.
واللي يزعل خاطرك بس مشه.
ما ابيك انا لمناقل الهرج سماع.
عسى ولي البيت عنا يقشه.
قلبي لبعدك مثل عشباً لزراع.
في تالي الموسم من العرق حشه.
عبدالله الدعيج
ابوريان
١٤٣٦/٥/٢٧هـ
؛:؛:؛:؛:؛:؛:؛:؛:؛:
هذه القصيدة مجاراة لقصيدة الشاعر
عبدالله الدعيج
ابوريان
والله ماالومك لوغدا قلبك اشلاعٍ
واللي يلومك فيه عجّلْ بطشَّهْ
واصبرترى في الكون منقذ وفَزَّاعْ
ياخذ بحقك و انت غلّكْ تفشّهْ
ويزين لك يَاخَيّ ماافسد من اوضاع
ولاَخَذْت محبوبك عن الناس خشَّهْ
تثأر و تنعم عقب صيفك بمرباع
والِّي براسك عقب ماجاك مَشًَهْ
وايّاك واللي مَامَلَكْ فَنّ و ابداع عرفه من الشطرنج ( كنْقهْ ) وكشَّهْ ّ مثلك ياابوريان قلب الفتى ضاع
والِّي قصَمْ ظَهْر الجمل مير قَشّهْ
تراي مثلك عشت والقلب منلاع
قلبي يحبه موت من يوم دَشَّهْ
ذقت بحياتي من هوى خلِّي انواع
ضيعت عمري معه والحال نَشَّهْ
طفلً غَرِيْر وفيه للعاشق اطماع
ساحر ويَسْبِي وازرق السحر رشَّهْ
اجْحَد واداري خوف لا السّرّ ينذاع
وفِيْنِي أمل في يوم يندار دَشّهْ
( ابوناصر ) محمد الشبيكي
١٤٣٦/٢٨/٥هـ
#############
في صبيحة اليوم الاثنين ١٤٣٦/٥/٢٥هـ
اعجبني منظر المطر و السحاب
فقلت
صوت الرعد يسمع وبارقه ينشاف ..
عسى الولي يسقي دياراً عزيزه ..
ديرة مرات اللي بها زين الأوصاف ..
روعة جمال الكون عندي تحيزه ..
عبدالله حمدالدعيج
ابوريان
===============
ترى الدوام وجلست البيت تنعاف
وحب المطر والبر فينا غريزه
يالله ياعبدالله ولا عاش من خاف
ننحر شعاب وسط دارٍ عزيزه
محمدالبخيتان
ابوعبدالرحمن
===============
سمعت لي بيتين شعر من القاف
اللي نظم بابيات شعر وجيزة
يذكر بها ان الرعد صار رجاف
وعلى مرات العز جاله ركيزه
دار عطاها الله زينات الاوصاف
وكميت معطيها معاني و ميزة
عبدالعزيز الضويحي ،ابوعبدالله
===============
يازين هاك الأرض عقب المطر طاف//شعبان تجري والشغايا لزيزه
وصوت الطيور اللي على الجال رفراف//والشمس عقب عصير تعطيه ميزه
حمد الدعيج ابومشعل
===============
ياماحلا رجع المطر عقب الانكاف
يعطي طهاة الارض روعه وميزه
واللي من الديره واللي من خلاف
قالوا لنا غدر بمده وجيزه
علي حمد الدعيج ابوحمد
==============
ارحب هلا بك يالمطر عدّ ماطاف
مسلم على حالين ربي مجيزه
بالبيت يسعى واهنيّه ويطَّاف
يدعي دعا بالصدر تسمع أزيزه
وحنا بعد مثله دعينا له اضعاف
يبست مراعينا وصارت جريزه
يارب اغثنا ينبت العشب اصناف
بهطلً حميمً له علامه و ميزه
وابل حيا يشتد به كل غرياف
برقه لمع و الرعد يطرب رزيزه
تسقي به ارواحً مع اشجار وارياف
وتحيي بلا دً مثل داري العزيزه
عشقي مرات كميت ملفى ومضياف
لاهل الكرم والطيب صارت ركيزه
البروالكشتات في الجدب تنعاف
وما عاد تسوى طلعةً له بريزه
ويارب ترحمنا ترى صابنا اتلاف
عقب المحاسى جف حتى نزيزه
لشوف المطريشتاق قلبك وينلاف
وحب المطر عند بن آدم غريزه
والبر يفتن عقب ماهوب ينعاف
يغري بكشتاته ويعجبك مَيْزَه
هذا لأنه يجذب اجناس واطياف
اخاف له في يوم نحتاج فيزه
ابوناصر محمد الشبيكي
محافظة مرات
١٤٣٦/٥/٢٧
=============
ياصاحبي ودي معي تجلس شوي ..
خلي عيوني تشبع لجوع فرقاك ..
مثلك يونّس خاطري دامني حي ..
يابعد كل الزين روحي فداياك ..
انت ربيع القلب يا قطرة المي ..
في جيتك تحيي عروقاً تمناك ..
اعيش في قربك انا بارد الفي ..
وفي بعدك عروقي عطاشا لمظماك..
كل العذارى في عيوني ولا شي ..
الا انت يا اللي مالقينا حلاياك ..
ليت الزمان اللي رحل يرجع شوي ..
واشوفك بجنبي واشاهد محياك ..
كل الجمال اللي اشوفه ترى انتي ..
وباقي جمال الكون شيناً بلياك ..
عسى الولي يحفظك يا صاحبي لي ..
ويحميك من شر العواذل ويرعاك ..
ابوريان
########
بديت با اللي كوّن الكون واحياه.
الخالق المعبود ربي وربك.
خالق جميع الناس من طين واعطاه.
عقلا تميز به عسيرات دربك .
وايضا بصر مع سمع ياصاح وياه.
صحة بدن جعل الولي ينيرقلبك.
حتى تعيش بدنيتكً تكسب رضاه.
وتصيرجنه لاغفر كل ذنبك.
وابعد عن العاصي وجنب خطاياه.
وافرح ببعده لوبغى اليوم قربك.
واتبع هل المعروف وافرح بلقياه.
في دنيتك تلقاه والله طبك.
وادمح زلل صاحبك واذكرمزاياه.
واحذر تخون بصاحباً صان حبك.
واختم كلامي مثل ماقلت مبداه.
الحمد للمعبود ربي وربك.
عبدالله الدعيج
ابوريـــــان
########
ماتت مواعيد اللقاء واظلم الليل ..
واسرجت ناري عل تدفا ظلوعي ..
طيفك انا وياه ليلي تعااليل ..
ولامن بان الفجر زادت وجوعي ..
ابوريان الدعيج
ليست هناك تعليقات:
إرسال تعليق