مع التحية و التقدير
لفارس الكلمة
للاستاذ ابراهيم المجلي ابوفارس
حمام لج بالحانه وانا بالفي قبل عصير
وهيضني قصيد الشاعر اللي شال بلحونه
هذاك اللي تنومسنا كتاباته مع التصوير
يجي نظمه مثل نظم الهلالي يوم يطرونه
هلا بالشاعر المبدع ولا في قافكم تقصير
على طرق اصيل يعجب اللي هم يغنونه
عباراتك مع اشعارك مع المنقول.. شغل غير
وللكلمة غديت الفارس اللي ما يطولونه
وانا اشهدلك يابوفارس ولاني من هل التزوير
جزيل النص من فكرك يصيب اهداف موزونه
ولاني ناسي الشاعر اخوكم فاله التقدير
اثني له تحياتي ودوم اشتاق لفنونه
راعي مراه ابوعبدالله اللي يتعب التعبير
في وصفه وفي ذكره و في تفصيل مضمونه
والا يابن مجلي يا ولد منهو عرف بالخير
لك الله ما ذكرت بكم سوى شي تعرفونه
عبدالعزيز بن عبدالله الضويحي
الاحد8/3/2015
مجاراة لقصيدة الشاعر عبدالعزيزالضويحي
التي وجهها لفارس الكلمه الأستاذ/ أبراهيم المجلي
على لج الحمام اللي بلحنه لج قبل عصير
نظمت ابياتي اللي طرقها ماهوب من هونه
بدعه اللي بدى بالوصف وابدع فيه بالتعبير
لحونً للضويحي تجبر الشاعر بمكنونه
على ذكر الشعرواهل الشعرواللي عليه يغير
وابوفارس قصيده بالمجالس مايملونه
لطيف النفس فاق الوصف شعره مايجي تقصير
يشدك بالقصيد اليا تغنى باعذب لحونه
حروف الشعرسيدها وسددهاعلى التسطير
واصبح فارس الكلمه وغيري به يقولونه
ولو بمدح علومه فالمراجل والوفى باحير
ابتعب واتعب الدفتر وكل اللي بيقرونه
حقيقه قلتها صادق واشهدها بلا تزوير
وقبلي قالها غيري وكل اللي يعرفونه
ابذكر ربي بذكره عدد ماغرد ابها الطير
عليه وكل من يقراء بذكر الله يعيذونه
محمدالبخيتان
١٤٣٦/٥/١٧
====
تخبرون الحمام اللي بلحنه لـج تالي عصير
وهيض له ثلاث صقور وهاج الشعر بـلحـونه
الأول فـل جنحانـه يحـوم الجـو له تدوير
رقا فوق السحاب وحط نجم سهيل من دونه
هذاك ابن الضويحي ما يبي موجز ولا تقرير
حفظه الحافظ الباري - تشوف الطيب في عيـونـه
بدع وأبدع وهو مبدع جزاه الله عني بخير
( وراعي الأوله ما ينلحق ) لو جبـت طبلـونـه
طلبتك يابو عبدالله تسامحني عن التقصير
عجز قافي يجملني - وباوصي من يـوفـونـه ؟
عليك الله وأمان الله ( حمام لـج عقب عصير )
إذا شفتوا الضويحي - ما نقص مني تـتـمونـه
وثاني ذا الصقور أشقر عريب الجد حومه غير
جميع الناس تحترمه واهالي مِراة يحبونه
هذاك محمد البخيتان رفيع الشان والتقـدير
حشى لله ما يَهرِج بكـلـمه غير مـوزونـه
صديقٍ صادقٍ مخلص وسيع البال مهما يصير
عسى ربي يبارك فيه ويرحم من ( ورث لونه )
وهذا صقرنا الثالث عرفنا منه كيف نـطيـر
أبو محمد يدرسنا بحور الشعر وفـنـونـه
قبل ما نعرف المليون وبرنامج صباح الخير
ابن مجيول يسامرنا بشيلاته وبشجونه
لهم مني تحية عجزت حروفي عن التعبير
بهم أفخر وأفاخر وأفتخر باللي يقولونه
عطوني ( فارس الكلمة ) ولها في القلب شان كبير
تكفيني شهادتهم - وشعري خذت مليـونـه
إلا يالله تجعـلني في عيني دايمٍ صغير
وتجعلني من أهل اللي بذكر الخير يطرونه
أبو فارس
١٩ / ٥ / ١٤٣٦ هـ
ليست هناك تعليقات:
إرسال تعليق