نويت اقوم بزيارة
قصيدة تراثية
نويت أقوم بزيارة جنوب كميت واكتاره
نحرت السوق من بدري اشوف البيت وأخباره
لقيت البيت ما هو بيت خراب هدت أسواره
وقفت وحارت الرجلين وشفت النفس محتاره
وطار غبار يا كثره عليه من البطى شاره
دخلت بغرفة المجلس وذكرت أبوي وكماره
ذكرت جدي وحنيت حنين النوق لحواره
وشفته يا عرب بالعين يشب النار بوجاره
أشوف الدلة الخمره يقلبها على ناره
يزل بدلة صفرا يحوف البن ببهاره
يلالي النجر وينادي مع الصفره يجي جاره
يصب من البكر فنجال يقعد الرأس وأفكاره
مشيت وخاطري محتار أدور وين مظهاره
نحرت الصفة القصيا أدور كود مصفاره
بقى لي عاقب البندق يجلجل وسط سحاره
وعلق بالوتد مشعاب وفوق الرف غداره
سواد سراج أبو دنان كثيف سود جداره
ويومي في شغا المحجان صميل يبست أشطاره
صميل فات له ماضي ألا يا حلوة مدراره
وباب الجصة مجافا عقب ما كان باسكاره
عقب وقت مضى يا حول صعيب فتح مسكاره
ووسط القوع به منحاز عليه من الدبل قاره
وجنبه دبة التنور تهشم وانتهى كاره
وهذه مربط (العطرا) بقى عرنون مسماره
وفوق بغرفة الروشن حمام يسكن اوكاره
يجر الصوت يا حسره يهوبل عند مطياره
يحدق بالنظر ويقول أمانة وينها سارة
يخانقها على المسطاح يلاعبها الهوى تاره
بقايا (نايم المدلول) طرايد شدها زراره
لطمني قوطي الشعشاع تناثر تالي كساره
روايح عطرها ما زال يخن بجانب الحاره
زباد وعنبر ومعمول يلوف لقلب مرَّاره
وهذا مغزل الغالي نقش في العود تذكاره
كتب في حافته سطرين ترى الأيام غداره
ترى عمر الفتى يا زين غصين تذبل أزهار
في صباح هذا اليوم ألأثنين الموافق 1434/1/5 صحونا على جو غائم مع رذاذ من المطر فتمثلت بهذين البييتين وأذنت للأحبة شعراء مرات بإكمال القصيدة كل شاعر يدلي ببيتين فقط لإفساح المجال لأكبر عدد من شعراء مرات. مع تحيات أخوكم ابو عبد العزيز الضويحي.
عسى السحاب اللي ترزم على كميت
يهل هملوله ويمطر ربابه
يملا شعيب الشمس وتجري المراريت
ويملا غدير كميت الى حد بابه
*************************
1-ياليت ابوعبدالعزيز ليت ياليت
قال الحزوم اللي جنوب شعابه
تسيل لين النخل عبر على البيت
بويتات طينن عامره من ترابه
(نديم كميت)
*************************
2-يطرب غريم الشوق راعي الكواشيت
لاحدر الكافت وكلش مشابه
وابعيج لاحدر معه ذايع الصيت
وادي النخيل اللي كثير شعابه
(محمدالهويمل)
**************************
3-يشوقني برق الحيا عالي كميت
والديمة اللي نازلة من سحابة
وقطر الندى فوق الزهر والمكاشيت
وبيوت شعر من البرازي عجابه
(صالح الضويحي)
**************************
4-دارن بهاعشت الشباب وتربيت
في كنف هاك الدار دار الذيابه
يسوقني شوقي ليامني ابطيت
لشوف الاثار وشوف دار القرابه
(عبيد ابن شجعان)
**************************
5-تشوف عينك كل ماصبحت وامسيت
روح الحياة وعزها والمهابه
متع نظرك وشاهد اللي تمنيت
يامدور" ن " كل الحلا والطرابه
(محمد المسلم)
**************************
6-وتشوف ريضان البلد كل ماجيت
زادت طرابتها القديمة طرابة
ما كنها الا واجهة قولدن قيت
في جو نجد سعد منهو مشابه
(عبدالعزيز بن عبدالله الضويحي)
**************************
7-يامرحبا اهلا وسهلا وحييت
يانابذن جو الحزن والكآبه
هذي مرات ان رحت اوغبت اوجيت
بجو الوسم يازينها مع سحابه
(علي بن حمد الدعيج)
************************
8-لاشفت نو(ن)قلت جعله على كميت
يمطر برفق(ن)لين تجري شعابه
آمين ياربي دعيتك وصليت
مانح وكافت يمتلن من سحابه
(عبدالله بن محمد الضويحي)
********************
9-يشوقني حب الضويحي على البيت
استاذي المحبوب ذيب الذيابه
احن لو ما جيت واشتاق لاجيت
لكميت والجفره وراعي المهابه
(احمد البخيتان)
*******************
10-سبحان من هو خالق الحي والميت
منزل حقوق المزن ومنشي سحابه
تغفر خطايه يا الولي كاني اخطيت
وترحم عزيزا ساكنا في ترابة
(ام تميم)
*******************
11-حيا الله الشعار مصبحت وامسيت
اهل الشعر واهل الفخر والمهابه
اهل الوشم سكانة مرات وكميت
اللـي غـلاهم حـق مـا يـنـسـخـابه
(أحمدالمانع)
**************************
12-ياذا السحاب اللي تزبرت وانشيت
ويدوي بك الرعاد عنف وصلابه
غنت بك الشعار بيت ن ورى بيت
وغنا بك محمد ولا به غرابه
(محمدالبخيتان)
************************
13-ويازين لامنك على السد مريت
وحارت قدم رجلك جمال ومهابه
فرشت في جاله قعدت وتقهويت
في خوة اللي فعلهم ينحكابه
(عبدالرحمن المجلي، راعي مرات)
***********************
14-البارحه في تالي الليل غنيت
هيض عليه من لفاني كتابه
عسى السحاب اللي توالى على كميت
ينهل هملوله ويسقي ترابه
(سلطان بن سهو العضياني)
******************
15- ومثلك يابن ضويحي تراني تمنيت
سحابة تفك رمز الشهابه
وان كانها بقولة عسى ثم ياليت.
عسى الوطن كله تعبر شعابه
( دعيج بن محمد)
**************
16-وإن رافقك ( فتحي ) تنومست ودليت
كل الشعاب سهولها مع هضابه
آعني ( حمد ) سمـّي على لاعب الكويت
حمد وفتحي في الملاعب تشابه
( إبراهيم المجلي / أبوفارس )
************----------
17- قولك يابن ضويحي ياطيب الصيت،،،
هيج حروف البيت وزاد التهابه
شوقك بشوف الماطر بعالي كميت ،،،
هذي مناة القلب وغاية طرابه
( عبدالله حمد الدعيج-ابوريان)
************----------
18- تنبت فياض الخير تحلا المكاشيت
مع رفقتي ويا السمر والربابه
وانظم حروف القاف بيت ورا بيت
لا شفت زول حبيّبي ف السحابة
(عبدالله الفرحان ابوعبدالعزيز)
************----------
ردا على ابيات ابوفارس
19- كل الشرف لامن على الدرب خاويت
بـراهـيـم اصـلاً لـلـسـنـع والـذرابـه
لو امدحه بالشعر لا اصبحت وامسيت
لا مـا يـوفّـي الشـعـر حـضـرة جـنـابه.
( راكان حمد الدايل )
***********************
20- يجي لها طاري على غير توقيت
وكل على ما قيل ولم زهابه
أكفخ مع اللي بالمراجل مناعيت
والا الردي ياحول ما احد درى به
(فهد بن عبدالله الضويحي)
************----------
21-تقدير لك يامرسل الرد رديت
وتقدير لاهل كميت كل وجنابه
ان كانها اماني طلبت وتمنيت
ياالله عسى دعواتهم مستجابه
(حلوان الحلوان)
************----------
22-والى انجلى تلقى رجال عناتيت
كل يولم عزبته في ركابه
من مصنع الجابان و الا شفرليت
ايضا و معهم من طوال الخشابه
(البرازي السهلي)
************----------
23-لاحت بروق(ن)شفتها عالي كميت
يالله عساها ماتعدى جنابه
تملى ديار طيبينن لهم صيت
صيت الكرم جاهم من الله وهابه
( بروق الرياض )
*************************
24- جاني على الواتس أب ياخوي كم بيت
مشاعر الشعار ربع و قرابه
حبيت اشارك مثلهم ماتوانيت
يا مرحبا ماهل وبل السحابه
( عبدالله عبدالعزيز الحسين )
************************
25- ويعم بلدان الوشم كلها ليت
وتربع ديار الوطن مثل غابه
والخير يملى دورهم بيت مع بيت
وتطغى على كل النفوس الحبابه
(عبدالعزيز بن عبدالحكيم الدعيج )
************----------
في مدح منتديات قبيلة السهول
مهداة الى اعضاء مجالس قبيلة السهول كافة
شاقني مجلسٍ " بالنت " فيه السهول = مجلسٍ للقبيلة ضم شبانها
;;;;
مجلسٍ للرجولة صدق فعل وقول = وعلم موروث من قديم شيبانها
;;;;
مجلسٍ يستضيف أهل الفكر والعقول = ويربط المجتمع بأقلام فرسانها
;;;;
ضم كل المعارف يتصف بالشمول = ويدخل المعرفة من كل بيبانها
;;;;
لو بغيت أمدحه مادري ويش اقول = الكرم والشهامة والعلم زانها
;;;;
من يروم المعالي مايناظر نزول = دايم فوق شامخ رافع شانها
;;;;
سلمولي على اللي مايعرف الخمول = من سلالة " اسهول " زم ميزانها
يا سوق جيتك عانيٍ لك على طول
جيتك أجدد ماضي الذكرياتي
يا سوق خبرني ترى القلب معلول
متعطشٍ لسنيننا الماضياتي
يمك حداني هاجس القلب ويقول
يمكن يصير الحلم صدق وثباتي
منوّلٍ يا سوق عامر ومدهول
واليوم جدرانك غدن موحشاتي
مديت شوفي وصرت أنا منه مذهول
وشلون خلاه البطا هالسواتي
يا سوق ما من دايج بك ولا زول
ولا صوت يسمع غير صوت اخطواتي
منوّلٍ مدهال من كنهن جول
إلى اقبلن بقدورهن مروياتي
واليوم عن شوف المحبين معزول
ما عاد لك كرت ولا لك طراتي
منع التجوّل من مشى فيك مجبول
ينصاك مثلي قصده الذكرياتي
يا سوق يوم العيد لك شوق وقبول
يوم البني بزينهن زاهياتي
الراس ضافي فوق الاكتاف مجدول
وفوق الجبين حلاق ومعلقاتي
اليامشن صوت الخلاخيل وحجول
كنه على قلب المشقى حصاتي
وملوي على الذرعان مجول ومفتول
من نعمة الله باللحم غايصاتي
وحَمَار بالمفرق خلط معه معمول
في وصف مدينة مرات يقول الشاعر عبدالله بن عبدالعزيز الضويحي
نور سطع من علاوي كميت "
" لاقبلـت بانـت تباشـيـره
سيفين ونخله غشاه الليـت "
" وقصر الملك خوش تصويره
يسطع على ديرة أهل الصيت "
" مـرات يـا حيهـا ديــره
واللي بدع رسمته عنتيـت "
" يازيـن رسمـه وتدبـيـره
ياليت نـاس فنـوا ياليـت "
" يرقـون ويناظـروا الديـره
يوم انهـم خابريـن كميـت "
" صعبـا عليهـم مشاويـره
يشاهـدون النخـل والبيـت "
" والسوق والجامـع وغيـره
ياضايق الصـدر الا مليـت "
" خذلك على كميـت تدويـره
النفـس ترتـاح الا طليت "
" والقلـب تنسـاح اساريـره
يا ديرتي فيـك لـو عديـت"
" خمسين شاعر لهـم سيـره
نبي بعضهم يجاري البيـت "
"ويكتب عن " كميت " تقريره
قصيدة ترحيبية صاغها الأديب والمؤرخ عبدالله بن عبدالعزيز الضويحي
بمناسبة زيارة أمير الرياض صاحب السمو الملكي الأمير خالدبن بندر بن عبدالعزيز وسمو نائبــه الامير تركي بن عبدالله لمحافظة مــرات بتاريخ 18 /6/1434هـ :
هــوَ ذا (كميت) وقد بدا يتســاءل
ماللضياءِ على مراتِ يُجــــــــللُ
ماللطيورِِ وقد تعالى شـــدوهـــــا
ماللنخيلِ بجذعِها تتمايـــــــــــــلُ
ماللسرورِ يعمُ كلَّ مواطــــــــــنٍ
ماللوجوهِ ببشرِها تتفــــــــــــاءلُ
هيَ ذي (مرات) بعرسِها جذلانة
طرِباً ويغمرها السرورُ الشامــلُ
هيَ ذي (مرات)بشيبها وشبابهــا
خرجت تُحيِي ضيفَها وتبجــــــلُ
يامرحباً بك (خالدٌ) وبصحبــِــكم
وعضيدُكم (تركي) صقرٌ أجـدلُ
اهلا بكم بين الأحبةِ أخــــــــــوةً
طبتم وطابَ مُقامُكـــــم والمنزلُ
يا(خالدُ) لك في القلوبِ محبــــة
يحظى بها من للمكارمِ نائــــــلُ
فبمثلِكم تزهو الرياضُ تفاخــــراً
وبمثلِكم ترقى البلادُ وترفـــــــلُ
آمــــــــالُنَا معقودةٌ بقدومِكـــــــم
ولنا مطالبُ للمدينةِ تؤمــــــــــلُ
آمـــــــالُنَا معقودةٌ بوجاهــــــــةٍ
فيها المؤمِلُ للمؤمَلِ يأمُـــــــــــلُ
فطموحُنا للمجدِ غاية همِنــَــــــا
وبكم تُذلُ لنا الصِعابُ وتسهُــــلُ
يكفينا فخرٌ عزنا من مجــــــدِنا
مجدٌ بنـاه آل السعـــــــــود الأُوَلُ
ومليكنا الغالي ربيع قلوبنـــــــا
وعضيده سلمان نعم المُوكـــــــلُ
اللهُ يحفظُ جمعهُم ويزيدُهـــــــم
عــــزاً ومجداً دائمــــاً يتأســـــلُ
*********
الأديب والمؤرخ عبدالله بن عبدالعزيز الضويحي
محافظة مرات
من منا لا يعرف البريديه.
التي لها نصيب من إسمها ففي الصيف
ليلها يكون بارد وهواؤها عليل.
تذكرت تلك الايام
فقلت هذه الابيات
التي هي عبارة عن خاطرة
ياماحلا جلسة بالصيف مع خوة في (البريديه)
مع لابة مايجيها الحيف وسيعة الصدر خدميه
في ليلة نورها بالكيف غيم وقمرا وشقرديه
وهبايب مع نسيم الهيف لطيفة البرد شرقيه
ومهيله مع نبوت السيف من طيب البن بريه
منصوبة للقرا والضيف في مجمر يلتهب ضيه
ووليمة حافها الحريف حطت على الصحن مشويه
وسوالف مابها هديف ولا بها روحه وجيه
سوالف اهل البحر والسيف واهل السلوم السنافيه
وياربعنا تهت بالتوصيف ماشفت مثل البريدية
لافي(ميامي) ولا(بجنيف) ليل نسايمه نجدية
ابو عبد العزيز الضويحي/ 1435/10/24هـ
الربيع في محافظة مرات
قف في مرات وردد لحنك الشادي
ياطائر السعد اتحفنا بإنشادي
هذا الربيع البديع الطلق غن به
مااجمل الشدو في الواحات والوادي
إصدح بلحن بعيد الدار يأنسه
أسمع رهين الهوى والغائب الغادي
الجو في(الشمس)و(القرعاء) معتدل
جو بديع له الولهان ينقادي
فيه النضارة والازهار باسقة
لا في (أوربا)ولا واحات بغدادي
يامؤلم الروح بالتفكير منهمكا
بدل أنينك.و الاحزان أعيادي
أطلق خيالك في الاجواء مبتسما
روح التفاؤل في الانسان إسعادي
وانعم برؤيتك الاعشاب وارفة
القلب يهفو لها مع رقصها الهادي
عبدالله عبدالعزيز الضويحي
محافظة مرات.١٤٣٥/٤/٨
ليست هناك تعليقات:
إرسال تعليق