قصيدة ألقاها بمناسبة زيارة مدير عام شئون البلديات لمدينة مرات
ألا يـا مرحبـا باللـي لفونـا للبـلـد زوار
عدد ما لاح براق المـزون وهـل ماطرهـا
وتحيه للمهندس احمد ووفـد معـه حضّـار
ومن لبّوا لنا الدعوة وجونـا مـن دوايرهـا
مرات اليوم صارت في بهاها تعجب الانظـار
ومن هو مرها تثبـت عيونـه لـه تطورهـا
بمدخلها المسارين ورصيف مبلـط وانـوار
وعلى عالي كميت المنتزه من فوق شاهرهـا
ومنهو طل منه أشرف على الديره يمين يسار
تشوقه نظرته لفنـون ماضيهـا وحاضرهـا
وفي بذل السعود ملوكنـا تنومسـي يـا دار
هل التوحيد هم ذخرك ولا تحسب خسايرهـا
ونشكر كل من ساهم ومن يسعى من الاخيار
ومن يدعم مشاريـع البلـد واللـي يقررهـا
ولبو ماجد شكر باللي بذل من جهد باستمرار
وحقيقه وقفته مـا تنجحـد والكـل خابرهـا
أقوله واعذروني باختصار القـول بالاشعـار
وصلاة الله وتسليمه على المختـار باخرهـا
قال الضويحي مبتدي باسم مولاه
............................عــزاه من قلب تزايد همومه
وعزي لمن مثلي شكا ضيم ماجاه
............................وعزي لمن مثلي يسامر نجومه
يابوفهد حلو الكرى ما عــرفناه
.........................والسد يا مشكاي باحت علومه
اصبحت مثل اللي نقل داه برداه
.......................... ويبغى الدوا ياكود تبرى كلومه
واسباب مابي من حبيب عرفناه
............................ درب المحبه والموده سلومه
يفرح ليا جيته وانا افرح بلقياه
... ........................ولرضاه نرخص كل غالي بسومه
واليوم يا مشكاي سافر لمرباه
............................ولي مدة ما اوحيت طاري قدومه
عزي لمن درب الهوى صار ممشاه
...............................تاه الطريق وقام يشرف رجومه
غديت مثل اللي همال مطاياه
.............................تفرقت في سهلها مع حزومه
أقبل عليه الوسم والذود ماجاه
...............................واصبح يخايل برقها في غيومه
دنّا الشداد وقربتين بها ماه
................................واخذ معه زاده ونفـّـذ كمومه
ركب على الفاطر مودع خوياه
................................متنحرٍ للنفد باعلى حثومه
دار الصحاري والغداري بها تاه
.............................أضفى على الصمان واصبح يحومه
القربتين اللي ملاهن مطواه
............................حل الضما به والشقا في سمومه
ضواه ليله ثم يبست شفاياه
........................واصبح يفرّك بالشواهد بهومه
أبا بدرب الحب واجهت ما جاه
..........................وقت السعد عقب الغضي فات يومه
عليه قلبي كن الامواس تلحاه
...........................ويلاه من قلب شكا من ثلومه
يا بوفهد طرد الهوى به معاناه
..........................معك خبر باللي رمتهم سهومه
فيما مضى لمجنون ليلى وما جاه
.........................عقب الجنون اصبح يشقق هدومه
وعزيز خاله يوم بالبير دلاه
.......................باسباب عليا صار يندم ليومه
ومحسن بحب قويت لا فته دنياه
........................ومحمد القاضي كونه همومه
وكم واحد ما باح بالسد وابداه
......................دش الهوى والوجد خابت حلومه
ذكرت بيت بالشعر قد سمعناه
......................وصبرت يوم ان المعاني ترومه
( اللي يهونها علينا ذكرناه
.....................جيل فنى ما باقي الا رسومه)
وصلاة ربي عد برق مطر ماه
..................واعداد رمل طعوس نفد جثومه
على النبي المختار من عند مولاه
.................عدة نجوم الليل واللي ينومه
عبدالله بن محمد الضويحي
ليست هناك تعليقات:
إرسال تعليق