هذي بيتين اعجبتني جدا وصح لسان قائلها و عدلت شطرها الاخير فقط الى
ومرات صارت بالمطر من عمدها
والقصيدة لم تكن لمرات فالاصل فأثرت ان اعدل عليها مع اعتذاري الشديد لقائلها و للبلد العزيز الذي قيلت فيه
حيث قال الشاعر:
البرق يبرق والسماء تسحر العين
ﻮالخير مقبل والعجب في رعدها
لندن على باريس عندي بقرشين
(ومرات صارت بالمطر من عمدها)
منقول
(ابوعبدالله)
وقام الاخ ابوريان بنشرها عبر برامج التواصل الاجتماعي مما ادى الى مجارتها من العديد من شعراء مرات
فقلت بعد مشاهدة هذه الردود على عجل:
عدلت شطر البيت من حول يومين
وجتنا ردود بينت لي سعدها
واللي نشر ذالبيت بين الدواوين
هذاك ابوريان يومه شهدها
والعذر كل العذر لشاعر الزين
اللي نظم كل البيوت وفندها
=======
مجاراة / أبو فارس
شاهد غدير كميت ياباغي الزين
منظر يسر العين ويجلي رمدها
والا شعيب النْخٓيل يسوى بلادين
لامن جرى !( دجله ) تبٓـيّـن حسدها
وكافت ومانح والرعن والبسيتين
وكمل شعيب الشمس باقي عددها
مرات هي داري وهي قرة العين
مالي بـلادٍ قـبـلـها أوبعدهـا
الحب ما هو بس للي مقيمين
من نام فيها يوم يصبح ولدها
إن مرها طرقي رجع لوبعد حين
وحجاج بيت الله عنت من بلدها
بالمختصر ماهيب لوعة محـبـيـن
مرات نرضع حبها من نـهدها
أبو فارس
=====
مجاراة / أبو إبراهيم
وكميت حاضنته مرات بذراعين
ام حنون في حضنها ولدها
بارز وفي جيده عقود ونياشين
وتاج على راسه وايده بيدها
ومن حولها تزهو طعامس نفودين
معا لم تبرز مفاتن جسدها
وفيها رجال في المجالس سلاطين
و وقت المنادى من بغاها وجدها
ذكر لهم معروف سقم المعادين
ودار لهم ما كل من جا هجدها
ومع ذا لهم في الجود درب وميادين
وبيت المراجل من مواقع عمد ها
واليوم ديرتنا علت في الدواوين
محافظه زانت ورفرف سعدها
في عهد ابو متعب حبيب الملايين
ايضا ولي عهده محلل عقدها
مرات ترفل في صفوف المزايين
بالعز والعمران جاها سندها
واصبح لها ذكر ن براس العناوين
تاريخها معروف للي وردها
ومن حمد ربي عاشت اليوم عيدين
في المنطقه يصدر قرار وحدها
محمد الدايل أبو إبراهيم
=======
مجاراة / أبو مشعل
مابين مابين الغيوم اقترب بين
وهلت على دار الكرم من بردها
ديرة مرات اللي بها ناس غالين
قامت تسابق برقها مع رعدها
(نديم كميت)
=====
مجاراة / أبو ناصر
بشر رياض العز بالوسم هالحين
عشرين يومً أو تز يد بعدد ها
ثم ينبت الزاهر وتذكي الرياحين
هبوبها اللي ينجلي به نكد ها
وتغرد الاطيار باحلى التلاحين
وتنبيك عن طيب الحياة وسعدها
في ديرةً تسوى جميع البلادين
(واستثني اللي طَوّلَ الله أمدها
طيبه والاقصى ثم مهوى الملايين
ارض الحرم ياسعد من هوعمدها)
قصدي مرات ومرتع اغلى المزايين
إبل وغنم وخيول ترعى بجردها
أرض الحباري والقطا والكراوين
فيهاالنحل يرعى وينتج شهدها
بالشمس والشميسه ولابالبساتين
ارض الارانب والظبا اول عهدها
يحلى لك المجلاس والمنزل الزين
من سمرهاوالا السّلَمْ خذ وقَدْها
وطرمه وبَدْها والودي والبسيتين
واماكن اخرى ماحضرني عددها
وريعان وسهولً بها قرة العين
غدران وفياضً سَعَدْ من وردها
قرعا وابا الحيران هذي براهين
وكافت وصدى والنخيل وسندها
ووديانً اخرى هن روافد من سنين
واليا بغاها أيّ واحد قصدها
والجفره أحلى ماشربنا تقل عين
ماطر سحاب مختلط مع بردها
من شرْب منها عاوده لو بعدحين
مااحدً نساها أوتناسى بلدها
أموت فيها واشهدوا يامسلمين
احبها وابا اندفن في لحدها
باذن الذي له كلبونا مصلين
اللي رفع سبعً بليا عمدها
من لامني فيها هبيل ومسيكين
لو ذاق ماذقناه هام و عبدها
ابوناصر محمد الشبيكي
======
مجاراة / أبوعبدالرحمن
ياطيبهم ربعي هل العرف والدين
حمايلً مانيب محصي عددها
وياعزوتي فيهم وسم المعادين
ياحضها داري بهم ياسعدها
قومن على عشق المراجل مجانين
باالطيب والنخوات محد(ن) جحدها
مرات داري وشهي ديار برلين
وشهي جنيف(ن) في كميت(ن) رفدها
مانيب زايد وصف في قرة العين
مرات عشقي واعتبرني ولدها
محمد البخيتان - ابوعبدالرحمن
يتبع مشاركات في قصيدة مرات
-----
مشاركة من أم تميم
هاذي مرات اتجملت بالرياحين
واستبشرت يوم أمطرت ياسعدها
وفيها رجال بحزة العسر واللين
تثبت فعايلها لمن جاء وقصدها
وحكامنا ال سعود للشعب وافين
الله يعز الدار ويرفع عمدها
أم تميم
=====
مشاركة من / أبو محمد فهد الفهيد
يادار يسلم من بدع فيك بيتين
يا عل عينه ما يجيها رمدها
عز الله أنه قال ما تستحقين
وانا اشهد إنه ما كذب في سندها
لا شك انا احبك ف عسرك وف اللين
في ماطرك ولا ف حامي جلدها
وان سالت الشعبان زين على زين
والا صبرنا لين ياتي سعدها
وانتي مرات من الف عام وتبقين
في ضامري لين اتوسد لحدها
أبومحمد / فهد الفهيد
قال عبدالله الدعيج (ابوريان)
من لامني في حب ذا الدار مسكين
احبها ياناس عاشق بلدها
ديرة مرات العز زين البلادين
هي منوة للنفس غاية سعدها
عسى المطر يعلها بالميادين
وتزهر فياض بان فيها جعدها
وعسى عدو الدار يعطى عمى العين
ياخذ سنين ما تداوى رمدها
(ابوريان)
******
ناس تغزل بالبنات المزايين
وناس تغزل في حضارة بلدها
وناس تغزل في صناعات بكين
وناس تغزل في الفلوس وعددها
وكل على مايشتهي صاغ بيتين
محد جبرها مير هذا سعدها
واللي يشوق القلب الماطر الزين
يسقي ديار الوشم ويروي جردها
واخص ديرة غالية بالبلادين
مرات دار العز وانا ولدها
حمدبن عبدالرحمن الدايل ابوعبدالرحمن
فاصلة
تعقيب (ابوفارس)
حسب ما أتضح لي لاحقاً أن البيتين البدع التي بنى عليها الاخوان مشاركاتهم الشطر الأخير معدل حيث عدله عبدالعزيز عبدالله الضويحي وأرسله لبو ريان ثم إنتشرت البيتين المعدلة في تويتر قبل أسبوع
ولم يجاريها أحد وبداء ابو فارس أمس وأستمرت المجاراة ولا زالت
ولا يعلم من أول من بدعها وأشبه ما تكون مشاعه
حيث عدلت لعدد من المدن الرياض وتمير والزلفي ومدن خارج المملكة مثلعمان
البرق يبرق والسماء تسحر العين
"والخير مقبل والعجب في رعـدها
"لندن على باريس عندي بقرشين
"سلم على عمــــان ولبـى اهلهـا
ليست هناك تعليقات:
إرسال تعليق