((((اخوانية معلمين.
عــام ١٤١٦هـ))))
✏✏✏✏✏✏✏✏
قال الشاعر
ابوعبدالعزيز الضويحي
مسندا على زميله نديم كميت:
انا من التدريس طاويني الهم
عزي لمن مثلي لهمه يصالي
هم من التحضير وهم بثر هم
وهم من البزران وهم عيالي
وهم من الروتين مع كثرة الكم
يجي لنا التعميم يقفاه تالي
يقضى دوام اليوم وأنا اتكلم
واقف على الرجلين عزي لحالي
من دوخة بالراس فكري تحطم
ومع كثرة الإرهاق مشغول بالي
والمشكلة لما الجداول تقسم
احد أخذ قسمة سمين وحالي
واحد ضغط وقيل له لا تظلم
هذا نصيبك قسمنا بالعدالي
يكرف طوال العام ويشرب من الغم
وغيره على الدوار يشرب زلالي
والي ذبحني يا حمد طالب العلم
القى من الطلاب جلف قبالي
اكرر التوضيح ويفور الدم
ازرع بصبخأ نبتها هرطبالي
اشرح دروسي والفتى فاتح الفم
وعينه تراوغ عن يمين وشمالي
الجسم حاضر ياحمد ماتفلهم
والفكر سارح منسجم بالخيالي
اشرح له الموضوع مره ومن ثم
ويقول فاهم بالوفا والكمالي
إلى سألته بالنحو قال لي سم
هذا بسيط واعربه بإعتدالي
ينصب لي المجرور مع كسرة الضم
يرفع علي الضغط ولا يبالي
نوب يهز الراس ونوب يتلعثم
ونوب يحط العذر كبر الجبالي
يا حسرتي لا شفت كوم ململم
فوق الكراسي مثل حمل الجمالي
شوف الدفاتر ياحمد يجلب الغم
يامال فرقى العين ياسم حالي
أصحح الغلطات وانا أتالم
كتم على العينين مثل الظلالي
الشوف قل وقل حيل المعلم
تكفى يابو مشعل طوتني الليالي
ترى المعلم مهنته طعمها سم
ونهايته للموت ولا الهبالي
عبدالله بن عبدالعزيز الضويحي
١٤١٦/٥/١٢هـ
🌱🌱🌱🌱🌱🌱🌱🌱
📝📝📝📝📝📝📝📝
وقد رد الشاعر
نديم كميت
بالقصيدة التالية :
ياشاكي هم الدراسه تولم ** ودع وخل مقيط ورشاه تالي
ان كان ودك صك بابك وسلم**فل الشراع وبيرق العز تالي
يكفي كفايه بس لا لا تظلم ** كلن عليه من الزمن وكف سالي
يابوعزيز القلب ياهو تثلم**اللي جرالك دوك ثبت جرالي
ليتك تدرس بس صفين بالضم**حتاك تعرف همنا ياحلالي
ماعندكم ماعندنا من تألم**حمل ثقيل فاق قدر احتمالي
ذي مهنة التدريس ياسقوة السم**تسقيه من نهر الندم و الخبالي
قلبه من الأوراق ياهو متبلم**وخشمه من الطبشور صابه خمالي
وفكره من التحضير صار متسمم**من لوعة الروتين مر وحالي
لاجيت تعبان يجي من ينمنم**قم رح تراك المنتظر بالتوالي
ولا جيت أبستأذن يجي سمعهم صم**بالنحنحه مافيه والله مجالي
ولا صار ورعي مصخن قيل لي نم** مافيه داعي روحتك للعيالي
هاذك يغتابك والاخر مغلدم**ولاجيت محتاج بدالي محالي
يقول لي تعبان ياخي تقدم**يمكن تشوف احد يوافق بدالي
تلقى المدرس بالمجالس مسلهم** واهل الوظايف في نقاش انفعالي
أنا أشهد انه عايش بالتندم ** ولا عاد ينفع قول يا هملالي
بالمدرسة غمين وبالبيت له غم ** وايضا الإجازه عمرها ما صفالي
اسبوع يمضي هم .. واسبوع منطم ** نحضر حضور نفل نطوي زوالي
مع ذا المدرس دوك محسود بالهم ** إن جا مجال مالقى له مجالي
هو ضحكة الروتين وإن جا يتكلم ** قالو هبيل فيه طبع الهبالي
كن المدرس مابعد خلق له فم ** ممنوع يشكي وإن شكى عزتالي
حمد الدعيج ، ابومشعل
نديم كميت ١٤١٦/٥/١٢هـ
📝📝📝📝📝📝📝📝
ليست هناك تعليقات:
إرسال تعليق